ఏఐసీసీ అంటే 'యాక్టింగ్ ఈజ్ కాంగ్రెస్ కల్చర్': బండి సంజయ్

కేంద్ర సహాయ మంత్రి, బీజేపీ సీనియర్ నేత బండి సంజయ్ కాంగ్రెస్ పార్టీపై తీవ్రస్థాయిలో విరుచుకుపడ్డారు. ఏఐసీసీ అంటే 'ఆల్ ఇండియా కాంగ్రెస్ కమిటీ' కాదని, 'యాక్టింగ్ ఈజ్ కాంగ్రెస్ కల్చర్' అని ఆయన కొత్త నిర్వచనం ఇచ్చారు. ఢిల్లీ నుంచి తెలంగాణ వరకు కాంగ్రెస్ నేతలకు ప్రజలకు సేవ చేయడంపై కాకుండా, నటించడంపైనే శిక్షణ ఇస్తున్నారని ఆయన ఎద్దేవా చేశారు. ఇచ్చిన 420 హామీలను అమలు చేసినట్లు, తీవ్రమైన భావోద్వేగంతో ఉన్నట్లు కాంగ్రెస్ నాయకులు నటిస్తున్నారని ఆరోపించారు.

కాంగ్రెస్ పార్టీ నిర్వహిస్తున్న డీసీసీ శిక్షణా తరగతులు పాలనపై సమీక్షల్లా కాకుండా, నటన నేర్పే వర్క్‌షాప్‌ల వలే ఉన్నాయని బండి సంజయ్ విమర్శించారు. నిజంగా ప్రజలకు సేవ చేసి ఉంటే ఈ రిహార్సల్స్ అవసరం ఉండేది కాదని, మార్పును ప్రజలే నేరుగా గమనించేవారని అన్నారు. కాంగ్రెస్ పార్టీ స్క్రిప్ట్ ఎప్పుడూ ఒకేలా ఉంటుందని, అందులో గాంధీ కుటుంబమే హీరో అని దుయ్యబట్టారు. కాంగ్రెస్ పార్టీ ఇప్పుడు ఒకే కుటుంబం యాజమాన్యంలో నడిచే షెల్ కంపెనీగా మారిపోయిందని ఆయన ఆరోపించారు. త్యాగాల గురించి మాట్లాడే ఈ మోసపూరిత కంపెనీ, నిజాయతీ గురించి దొంగలు నీతులు చెప్పినట్లుగా ఉందని అన్నారు. ఆ పార్టీ యజమానులు అవినీతి కేసులు, చట్టపరమైన విచారణలను ఎదుర్కొంటున్నారని గుర్తుచేశారు.

తెలంగాణ ముఖ్యమంత్రి రేవంత్ రెడ్డి గతంలో కాంగ్రెస్, గాంధీ కుటుంబంపై భిన్నంగా మాట్లాడారని, కానీ కాంగ్రెస్ యాక్టింగ్ క్లాసుల్లో చేరిన తర్వాత ఆయన కూడా మాట మార్చారని సంజయ్ విమర్శించారు. ఇప్పుడు గాంధీ కుటుంబమే త్యాగాలు చేసిందంటూ పాత పాటే పాడుతున్నారని అన్నారు. దేశంలో ఎమర్జెన్సీ విధించి, న్యాయవ్యవస్థను బలహీనపరిచిన కాంగ్రెస్ పార్టీకి రాజ్యాంగం గురించి మాట్లాడే అర్హత లేదని స్పష్టం చేశారు. లక్షలాది మంది భారతీయుల త్యాగాలను విస్మరించి, స్వాతంత్ర్య పోరాటానికి ఒకే కుటుంబం రాయల్టీ క్లెయిమ్ చేస్తోందని మండిపడ్డారు.

కాంగ్రెస్ పార్టీకి రాష్ట్రాలు ఏటీఎం యంత్రాల్లా కనిపిస్తాయని, కానీ బీజేపీకి మాత్రం అవి అభివృద్ధి యంత్రాలుగా కనిపిస్తాయని బండి సంజయ్ అన్నారు. ప్రధానమంత్రి నరేంద్ర మోదీ నాయకత్వంలో 'సబ్ కా సాథ్, సబ్ కా వికాస్, సబ్ కా విశ్వాస్, సబ్ కా ప్రయాస్' అనే నిబద్ధతతో పాలన సాగుతోందని తెలిపారు. అందరి కోసం అభివృద్ధి, ఎవరికీ బుజ్జగింపులు ఉండవన్నదే తమ విధానమని ఆయన స్పష్టం చేశారు.