వాష్ రూంలో సీక్రెట్ కెమెరా... కన్నడ నటికి చేదు అనుభవం!

బెంగళూరులో ఓ కన్నడ టీవీ నటి తీవ్ర వేధింపులకు గురయ్యారు. స్టేడియం వాష్‌రూమ్‌లో తనను రహస్యంగా వీడియో తీసిన ఓ ఆగంతుకుడు, ఆ వీడియోలతో డబ్బు కోసం బ్లాక్‌మెయిల్ చేస్తున్నాడని ఆమె పోలీసులకు ఫిర్యాదు చేశారు. ఈ ఘటనపై బెంగళూరు సైబర్ క్రైమ్ పోలీసులు కేసు నమోదు చేసి దర్యాప్తు చేపట్టారు.

వివరాల్లోకి వెళితే, బెంగళూరులోని కోరమంగళ ఇండోర్ స్టేడియంలో మహిళా సెలబ్రిటీల కోసం క్రికెట్ టోర్నమెంట్ నిర్వహించారు. ఈ టోర్నమెంట్‌లో పాల్గొన్న సదరు నటి, ఫిబ్రవరి 7న అక్కడి వాష్‌రూమ్‌కు వెళ్లారు. ఆ సమయంలో ఎవరో రహస్యంగా కెమెరా అమర్చి ఆమెను అశ్లీలంగా చిత్రీకరించారు.

కొన్ని రోజుల తర్వాత, ఆ వీడియోను ఆమె స్నేహితురాలి ఇన్‌స్టాగ్రామ్ ఖాతాకు పంపిన నిందితుడు, డబ్బు ఇవ్వకపోతే సోషల్ మీడియాలో పోస్ట్ చేస్తానంటూ బెదిరింపులకు పాల్పడ్డాడు. దీంతో ఆ నటి, జరిగిన విషయాన్ని వివరిస్తూ ఫిబ్రవరి 13న పోలీసులను ఆశ్రయించారు. కొన్ని ఆధారాలను కూడా ఆమె సమర్పించినట్లు తెలిసింది.

నటి ఫిర్యాదు మేరకు ఐటీ యాక్ట్‌తో పాటు, ఐపీసీలోని వాయిరిజం (రహస్యంగా తొంగిచూడడం), క్రిమినల్ ఇంటిమిడేషన్ (నేరపూరిత బెదిరింపులు), ఎక్స్‌టార్షన్‌ (బలవంతంగా డబ్బు వసూలు)కు సంబంధించిన సెక్షన్ల (77, 351, 308) కింద కేసు నమోదు చేసినట్లు పోలీసులు తెలిపారు. నిందితుడిని పట్టుకునేందుకు గాలింపు ముమ్మరం చేశారు. ఈ ఘటనతో కన్నడ సినీ, టీవీ పరిశ్రమల్లో కలకలం రేగింది. మహిళా కళాకారుల భద్రతపై మరోసారి ఆందోళన వ్యక్తమవుతోంది.