టీ20 ప్రపంచకప్‌లో పెను సంచలనం.. వాన దెబ్బకు టోర్నీ నుంచి ఆసీస్ అవుట్

టీ20 ప్రపంచకప్ 2026లో ఓ భారీ సంచలనం నమోదైంది. మాజీ ఛాంపియన్, పటిష్టమైన ఆస్ట్రేలియా జట్టు సూపర్-8 దశకు చేరకుండానే టోర్నీ నుంచి నిష్క్రమించింది. పల్లెకెలె అంతర్జాతీయ స్టేడియంలో మంగళవారం జింబాబ్వే, ఐర్లాండ్ జట్ల మధ్య జరగాల్సిన గ్రూప్ స్టేజ్ మ్యాచ్ వర్షం కారణంగా టాస్ కూడా పడకుండానే రద్దు కావడం ఆసీస్ అవకాశాలను దెబ్బతీసింది. మ్యాచ్ రద్దుతో జింబాబ్వే, ఐర్లాండ్ జట్లకు చెరో పాయింట్ లభించింది. దీంతో జింబాబ్వే పాయింట్ల పట్టికలో 5 పాయింట్లకు చేరుకుని సూపర్-8లో తమ స్థానాన్ని ఖాయం చేసుకుంది.

గ్రూప్-బిలో ఇప్పటికే శ్రీలంక 6 పాయింట్లతో అగ్రస్థానంలో ఉండగా, జింబాబ్వే 5 పాయింట్లతో రెండో స్థానానికి చేరింది. దీంతో 2021 ఛాంపియన్ అయిన ఆస్ట్రేలియా తన చివరి మ్యాచ్‌లో గెలిచినా గరిష్ఠంగా 4 పాయింట్లను మాత్రమే అందుకోగలదు. ఈ సమీకరణాలతో మిచెల్ మార్ష్ నేతృత్వంలోని జట్టు టోర్నీ నుంచి నిష్క్రమించడం ఖాయమైంది. ఆసీస్ వరల్డ్ కప్ లో గ్రూప్ దశ నుంచే నిష్క్రమించడం 17 ఏళ్ల తర్వాత ఇదే మొదటిసారి.

ఈ మ్యాచ్ రద్దు ఆస్ట్రేలియాకే కాకుండా ఐర్లాండ్‌కు కూడా చేదువార్తను అందించింది. తొలి రెండు మ్యాచ్‌లలో ఓడి, ఒమన్‌పై 96 పరుగుల భారీ విజయంతో రేసులోకి వచ్చిన ఐర్లాండ్.. సూపర్-8 ఆశలు సజీవంగా ఉండాలంటే ఈ మ్యాచ్‌లో గెలవడం తప్పనిసరి. కానీ వర్షం కారణంగా కేవలం ఒక పాయింట్‌తోనే సరిపెట్టుకుని, మొత్తం 3 పాయింట్లతో టోర్నీ నుంచి నిష్క్రమించింది.

గత 2024 టీ20 ప్రపంచకప్‌కు అర్హత సాధించలేకపోయిన జింబాబ్వే.. ఈసారి ఆఫ్రికా క్వాలిఫయర్స్‌లో అగ్రస్థానంలో నిలిచి టోర్నీలో అడుగుపెట్టింది. సికందర్ రజా నేతృత్వంలోని ఈ జట్టు తమ తొలి మ్యాచ్‌లో ఒమన్‌పై 8 వికెట్ల తేడాతో గెలిచి, రెండో మ్యాచ్‌లో బలమైన ఆస్ట్రేలియాపై 23 పరుగుల తేడాతో సంచలన విజయం సాధించింది. ఇప్పుడు సూపర్-8 దశకు అర్హత సాధించి సత్తా చాటింది. సూపర్-8కు ముందు, జింబాబ్వే తమ చివరి గ్రూప్ మ్యాచ్‌లో గురువారం ఆతిథ్య శ్రీలంకతో తలపడనుంది.

అయితే, సూపర్-8లో జింబాబ్వేకు అసలైన సవాలు ఎదురుకానుంది. డిఫెండింగ్ ఛాంపియన్ భారత్, 2024 రన్నరప్ దక్షిణాఫ్రికా, రెండుసార్లు ఛాంపియన్ వెస్టిండీస్‌లతో కూడిన కఠినమైన గ్రూప్‌లో జింబాబ్వే పోటీపడనుంది. సెమీఫైనల్‌కు చేరాలంటే ఈ గ్రూప్‌లో తొలి రెండు స్థానాల్లో నిలవాల్సి ఉంటుంది.