పాక్ చేతుల్లోంచి మ్యాచ్ జారిపోయింది అప్పుడే!: వకార్ యూనిస్

టీ20 ప్రపంచకప్ 2026లో భాగంగా భారత్‌తో జరిగిన మ్యాచ్‌లో పాకిస్థాన్ 61 పరుగుల తేడాతో ఓటమి పాలైంది. ఈ నేపథ్యంలో పాక్ ఓటమికి గల కారణాలను ఆ జట్టు మాజీ కెప్టెన్, పేస్ దిగ్గజం వకార్ యూనిస్ విశ్లేషించాడు. భారత్ 175 పరుగులు చేసినప్పుడే పాకిస్థాన్ చేతుల్లోంచి మ్యాచ్ జారిపోయిందని స్పష్టం చేశాడు.

స్టార్ స్పోర్ట్స్‌తో మాట్లాడుతూ.. పాకిస్థాన్ బౌలింగ్ మార్పుల్లో తెలివిగా వ్యవహరించలేదని వకార్ అన్నాడు. "తొలి ఇన్నింగ్స్‌లోనే పాక్ ఓటమి ఖరారైంది. భారత్ అంత భారీ స్కోరు చేశాక గెలవడం చాలా కష్టం. స్పిన్నర్ ఉస్మాన్ తారిఖ్‌ను బౌలింగ్‌కు ఆలస్యంగా దించడం పెద్ద తప్పిదం. అతను బౌలింగ్‌కు వచ్చేసరికే ఇషాన్ కిషన్ విధ్వంసం సృష్టించాడు. అదే మ్యాచ్‌ను మలుపు తిప్పింది. భారత్ 175 బదులు 140 లేదా 150 పరుగులు చేసి ఉంటే ఫలితం మరోలా ఉండేది" అని పేర్కొన్నాడు.

ఈ మ్యాచ్‌లో తొలుత బ్యాటింగ్ చేసిన భారత్, ఇషాన్ కిషన్ (40 బంతుల్లో 77) అద్భుత ఇన్నింగ్స్‌తో 175/7 పరుగుల భారీ స్కోరు చేసింది. అనంతరం లక్ష్య ఛేదనలో పాకిస్థాన్‌ను జస్‌ప్రీత్ బుమ్రా, హార్దిక్ పాండ్య తమ పదునైన బౌలింగ్‌తో ఆరంభంలోనే దెబ్బతీశారు. ఉస్మాన్ ఖాన్ (44) కాసేపు ప్రతిఘటించినా ఫలితం లేకపోయింది. భారత కెప్టెన్ సూర్యకుమార్ యాదవ్ తన వ్యూహాత్మక కెప్టెన్సీతో ఆకట్టుకున్నాడని, పరిస్థితులకు తగ్గట్టుగా బౌలర్లను మార్చాడని భారత క్రికెట్ దిగ్గజం సునీల్ గవాస్కర్ కూడా ప్రశంసించాడు.

ఈ విజయంతో భారత్ వరుసగా మూడో గెలుపు నమోదు చేసి సూపర్-8 దశకు అర్హత సాధించింది. మరోవైపు, పాకిస్థాన్ తన చివరి గ్రూప్ మ్యాచ్‌లో నమీబియాపై గెలిస్తేనే సూపర్-8 అవకాశాలు సజీవంగా ఉంటాయి.