బయటపడ్డ ఎప్‌స్టీన్ అసలు వారసురాలు.. ఎవరీ కరీనా షులియాక్?

లైంగిక నేరగాడు, అమెరికా ఫైనాన్షియర్ జెఫ్రీ ఎప్‌స్టీన్ కేసులో సంచలన విషయాలు వెలుగులోకి వచ్చాయి. అతడి ప్రియురాలు, బెలారస్‌కు చెందిన డెంటిస్ట్ కరీనా షులియాక్... ఎప్‌స్టీన్ ప్రధాన వారసురాలని, జైలు నుంచి అతను చేసిన చివరి ఫోన్ కాల్ ఆమెకేనని తాజాగా విడుదలైన పత్రాలు వెల్లడించాయి. "ఎప్‌స్టీన్ ఫైల్స్ ట్రాన్స్‌పరెన్సీ యాక్ట్" కింద అమెరికా న్యాయశాఖ విడుదల చేసిన డాక్యుమెంట్లలో ఈ వివరాలు బయటపడ్డాయి.

ఎప్‌స్టీన్ ఆగస్టు 10, 2019న జైలులో ఆత్మహత్య చేసుకోగా, దానికి కేవలం రెండు రోజుల ముందు అంటే ఆగస్టు 8న "ది 1953 ట్రస్ట్" పేరుతో తన ఆస్తినంతా బదిలీ చేశాడు. ఇందులో ప్రధాన లబ్ధిదారుగా కరీనా షులియాక్ పేరును చేర్చాడు. సుమారు 100 మిలియన్ డాలర్ల వరకు ఆస్తి, న్యూయార్క్, పారిస్‌లోని ఇళ్లు, 33 క్యారెట్ల వజ్రపు ఉంగరాన్ని ఆమెకు ఇవ్వాలని వీలునామాలో పేర్కొన్నాడు. పెళ్లి చేసుకోబోతున్నందున ఈ ఉంగరాన్ని ఇస్తున్నట్లు చేతిరాతతో రాసిన నోట్ కూడా ఈ పత్రాల్లో ఉంది.

ఆగస్టు 9, 2019 సాయంత్రం, అంటే చనిపోవడానికి ఒక రోజు ముందు, ఎప్‌స్టీన్ జైలు నుంచి చివరిసారిగా ఫోన్ చేసింది కూడా కరీనాకే. నిబంధనలకు విరుద్ధంగా, రికార్డ్ చేయని ఈ కాల్ చేసేందుకు జైలు అధికారులు అనుమతించారు. 2004లోనే చనిపోయిన తల్లికి ఫోన్ చేస్తున్నానని చెప్పి అతను కరీనాతో మాట్లాడినట్లు ఇన్స్‌పెక్టర్ జనరల్ ఆఫీస్ నివేదిక ధ్రువీకరించింది.

ఎప్‌స్టీన్ ఆస్తి విలువ మొదట్లో సుమారు 600 మిలియన్ డాలర్లుగా అంచనా వేసినా, బాధితుల కోసం ఏర్పాటు చేసిన నిధి నుంచి ఇప్పటికే 121 మిలియన్ డాలర్లు చెల్లించడంతో ఆస్తి విలువ గణనీయంగా తగ్గింది. ప్రస్తుతం దీని విలువ సుమారు 127 మిలియన్ డాలర్లుగా ఉంది. బాధితులు, రుణదాతల క్లెయిమ్‌లు పరిష్కరించిన తర్వాతే వారసులకు ఏమైనా మిగులుతుందని ఎస్టేట్ న్యాయవాదులు చెబుతున్నారు.