టీమిండియా క్రికెటర్ ఫేస్ బుక్ ఖాతా హ్యాక్

టీమిండియా యువ క్రికెటర్, ఐపీఎల్ స్టార్ రింకు సింగ్ ఫేస్‌బుక్ ఖాతా హ్యాక్‌కు గురైంది. బిజీ క్రికెట్ షెడ్యూల్ కారణంగా రింకు కొన్ని నెలలుగా సోషల్ మీడియాకు దూరంగా ఉండటంతో ఈ విషయం ఆలస్యంగా వెలుగులోకి వచ్చింది. ఈ ఘటనపై రింకు సోదరుడు సోను సింగ్ ఇచ్చిన ఫిర్యాదు మేరకు అలీగఢ్ పోలీసులు కేసు నమోదు చేసి దర్యాప్తు ప్రారంభించారు.

వివరాల్లోకి వెళితే, క్రికెట్ మ్యాచ్‌ల కారణంగా రింకు సింగ్ గత కొంతకాలంగా తన ఫేస్‌బుక్ ఖాతాను యాక్సెస్ చేయలేదు. ఇదే అదునుగా భావించిన సైబర్ నేరగాళ్లు అతడి ఖాతాను హ్యాక్ చేశారు. ఖాతా ఎప్పుడు హ్యాక్ అయిందనే దానిపై స్పష్టత లేనప్పటికీ, అనుమానం రావడంతో రింకు సోదరుడు సోను సింగ్ పోలీసులను ఆశ్రయించాడు.

ఫిర్యాదు స్వీకరించిన అలీగఢ్ సైబర్ క్రైమ్ సెల్ అధికారులు కేసు నమోదు చేసి దర్యాప్తు చేపట్టారు. హ్యాకర్లను గుర్తించే పనిలో నిమగ్నమయ్యారు. హ్యాక్ చేసిన ఖాతాను ఉపయోగించి ఏవైనా ఆర్థిక మోసాలకు పాల్పడ్డారా లేదా అభ్యంతరకర పోస్టులు పెట్టారా అనే కోణంలో కూడా విచారణ జరుపుతున్నారు.