టీ20 వరల్డ్ కప్.. బంగ్లా జర్నలిస్టుల అక్రిడిటేషన్‌పై ఐసీసీ పునరాలోచన

భారత్‌లో జరగనున్న టీ20 ప్రపంచ కప్‌కు సంబంధించి బంగ్లాదేశ్ జర్నలిస్టుల మీడియా అక్రిడిటేషన్ ప్రక్రియను ఐసీసీ పునఃసమీక్షిస్తోంది. భద్రతా కారణాలను చూపుతూ ఈ మెగా టోర్నీ నుంచి బంగ్లాదేశ్ జట్టు తప్పుకోవడమే ఇందుకు ప్రధాన కారణం. ఇప్పటికే పలువురు బంగ్లా జర్నలిస్టుల దరఖాస్తులను తిరస్కరించినట్లు వార్తలు వస్తున్న నేపథ్యంలో ఐసీసీ ఈ నిర్ణయం తీసుకుంది.

ఈ పరిణామాలపై ఐసీసీ వర్గాలు పీటీఐకి వివరణ ఇచ్చాయి. టోర్నీ నుంచి బంగ్లా జట్టు వైదొలగడంతో షెడ్యూళ్లు, అభ్యర్థనల సంఖ్యలో మార్పులు వచ్చాయని, అందుకే అక్రిడిటేషన్ జాబితాలను తిరిగి రూపొందిస్తున్నామని తెలిపాయి. సుమారు 80-90 మంది బంగ్లాదేశ్ జర్నలిస్టులు అక్రిడిటేషన్ కోసం దరఖాస్తు చేసుకున్నారని, ఒకవేళ వారి జట్టు టోర్నీలో పాల్గొన్నా దేశ కోటా ప్రకారం 40 మందికి మించి అనుమతించడం సాధ్యం కాదని ఐసీసీ వర్గాలు స్పష్టం చేశాయి.

మరోవైపు ఈ విషయాన్ని ఐసీసీ దృష్టికి తీసుకెళ్లామని బంగ్లాదేశ్ క్రికెట్ బోర్డు (బీసీబీ) మీడియా విభాగం అధికారి అమ్జద్ హుస్సేన్ ఢాకాలో తెలిపారు. అక్రిడిటేషన్ దరఖాస్తుల తిరస్కరణపై వివరణ కోరినట్లు ఆయన పేర్కొన్నారు. "దాదాపు 8-9 ఐసీసీ ప్రపంచ కప్‌లను కవర్ చేసిన నా అప్లికేషన్‌ను తిరస్కరించడం ఇదే మొదటిసారి" అని ఓ సీనియర్ బంగ్లా జర్నలిస్ట్ ఆవేదన వ్యక్తం చేశారు.

తాజా నిబంధనల ప్రకారం బంగ్లాదేశ్ మీడియా సభ్యులు మళ్లీ అక్రిడిటేషన్ కోసం దరఖాస్తు చేసుకోవాల్సి ఉంటుంది. ప్రతి దరఖాస్తును కేసుల వారీగా పరిశీలించి తుది నిర్ణయం తీసుకుంటారు. భారత్‌లో బంగ్లా జట్టుకు ఎలాంటి భద్రతా ముప్పు లేదని ఐసీసీ అంచనా వేసినప్పటికీ, ఆ దేశ బోర్డు మాత్రం తమ జట్టును పంపకూడదని నిర్ణయించుకుంది. ఈ టోర్నీలో బంగ్లాదేశ్ స్థానంలో స్కాట్లాండ్‌ను ఐసీసీ భర్తీ చేసింది. ఈ టోర్నమెంట్ ఫిబ్రవరి 7న ప్రారంభం కానుంది.