ఫుట్‌బాల్ మైదానంలో నరమేధం... 11 మంది బలి

మెక్సికోలో మరోసారి తుపాకులు గర్జించాయి. ఓ ఫుట్‌బాల్ మ్యాచ్ ముగిసిన వెంటనే సాయుధులైన దుండగులు జరిపిన కాల్పుల్లో 11 మంది ప్రాణాలు కోల్పోగా, మరో 12 మంది గాయపడ్డారు. దేశ మధ్య ప్రాంతంలోని గ్వానాజువాటో రాష్ట్రంలోని సలమాంకా నగరంలో ఆదివారం ఈ దారుణ ఘటన చోటుచేసుకుంది.

స్థానిక కమ్యూనిటీ ఫుట్‌బాల్ గ్రౌండ్‌లో మ్యాచ్ ముగిసిన తర్వాత కొందరు సాయుధులు మైదానంలోకి దూసుకొచ్చి, అక్కడున్న క్రీడాభిమానులపై విచక్షణారహితంగా కాల్పులు జరిపారు. ఈ దాడిలో 10 మంది అక్కడికక్కడే మరణించగా, మరొకరు ఆసుపత్రిలో చికిత్స పొందుతూ మృతి చెందారు. గాయపడిన వారిలో ఒక మహిళ, ఒక బాలుడు కూడా ఉన్నట్లు అధికారులు తెలిపారు.

ఈ హింసాత్మక ఘటనపై సలమాంకా మేయర్ సీజర్ ప్రియెటో తీవ్రంగా స్పందించారు. ఇది ఆర్గనైజ్డ్ క్రైమ్ ముఠాల పనేనని ఆయన ఆరోపించారు. "మా ప్రాంతంలో శాంతిని పునరుద్ధరించడానికి కేంద్ర ప్రభుత్వం సహాయం చేయాలి. నేర ముఠాలు అధికారులను లొంగదీసుకోవడానికి ప్రయత్నిస్తున్నాయి," అని ఆయన ఆవేదన వ్యక్తం చేశారు.

పారిశ్రామికంగా అభివృద్ధి చెందినప్పటికీ, గ్వానాజువాటో రాష్ట్రం దేశంలోనే అత్యధిక హత్యలు జరిగే ప్రాంతంగా మారింది. ఇక్కడ ఆయిల్ దొంగిలించే సాంటా రోసా డి లిమా గ్యాంగ్, జలిస్కో న్యూ జెనరేషన్ డ్రగ్ కార్టెల్ మధ్య ఆధిపత్య పోరు తీవ్ర స్థాయిలో ఉంది. ఈ ఘటన మెక్సికోలో కొనసాగుతున్న డ్రగ్ ముఠాల హింసకు మరోసారి అద్దం పట్టింది. పోలీసులు నిందితుల కోసం గాలింపు చర్యలు ముమ్మరం చేశారు.