గుంటూరులో వ్యభిచార గృహంపై పోలీసుల దాడి.. ఆరుగురి అరెస్ట్

గుంటూరు పట్టాభిపురంలో ఓ వ్యభిచార ముఠా గుట్టును టాస్క్‌ఫోర్స్ పోలీసులు రట్టు చేశారు. ఓ ఇంట్లో అసాంఘిక కార్యకలాపాలు నిర్వహిస్తున్నారన్న పక్కా సమాచారంతో దాడులు నిర్వహించి, మొత్తం ఆరుగురిని అదుపులోకి తీసుకున్నారు.

పట్టాభిపురం పోలీస్ స్టేషన్ పరిధిలోని పండరీపురం 5వ లైనులో కొంతకాలంగా ఆర్గనైజ్డ్ వ్యభిచారం జరుగుతున్నట్లు టాస్క్‌ఫోర్స్ సిబ్బందికి సమాచారం అందింది. దీంతో ఉన్నతాధికారుల ఆదేశాల మేరకు, టాస్క్‌ఫోర్స్ సిబ్బంది స్థానిక పోలీసులతో కలిసి సంయుక్తంగా ఆ ఇంటిపై మెరుపు దాడి చేశారు.

ఈ దాడుల్లో ఒక నిర్వాహకుడు, ఇద్దరు విటులతో పాటు ముగ్గురు మహిళలను పోలీసులు పట్టుకున్నారు. వారి వద్ద నుంచి రూ.1,960 నగదు, 5 సెల్ ఫోన్లను స్వాధీనం చేసుకున్నారు. పట్టుబడిన ఆరుగురిని తదుపరి విచారణ, చట్టపరమైన చర్యల నిమిత్తం పట్టాభిపురం పోలీస్ స్టేషన్‌కు తరలించారు. ఈ ఘటనపై కేసు నమోదు చేసి దర్యాప్తు చేస్తున్నట్లు పోలీసులు తెలిపారు.