మమ్ముట్టి కొత్త చిత్రం... 'పాదయాత్ర'

మలయాళ మెగాస్టార్ మమ్ముట్టి తన తదుపరి సినిమా టైటిల్‌ను శుక్రవారం అధికారికంగా ప్రకటించారు. మలయాళ చిత్ర పరిశ్రమలో దిగ్గజ దర్శకుడిగా పేరున్న అదూర్ గోపాలకృష్ణన్‌తో కలిసి ఆయన పని చేయనున్నారు. ఈ సినిమాకు 'పాదయాత్ర' అనే టైటిల్‌ను ఖరారు చేశారు. సోషల్ మీడియా వేదికగా "నా తదుపరి చిత్రం #Padayaatra" అంటూ మమ్ముట్టి ఈ పోస్టర్‌ను పంచుకున్నారు.

దాదాపు మూడు దశాబ్దాల తర్వాత మమ్ముట్టి, అదూర్ గోపాలకృష్ణన్ కాంబినేషన్‌లో సినిమా వస్తుండటంతో అభిమానుల్లో భారీ అంచనాలు నెలకొన్నాయి. వీరిద్దరూ కలిసి పనిచేయడం ఇది నాలుగోసారి కావడం విశేషం. ఈ చిత్రంలో మమ్ముట్టితో పాటు ఇంద్రాన్స్, గ్రేస్ ఆంటోనీ, శ్రీష్మ చంద్రన్, జీనత్ తదితరులు కీలక పాత్రలు పోషిస్తున్నారు. ఈ ప్రాజెక్టులో భాగం కావడంపై నటి గ్రేస్ ఆంటోనీ సంతోషం వ్యక్తం చేశారు. "జీవితం కొన్నిసార్లు పెద్ద ఆశ్చర్యాలను ఇస్తుంది. నా కల నిజమైంది. ఒక నటి ఇంతకంటే ఏం కోరుకుంటుంది?" అని ఆమె ఇన్‌స్టాగ్రామ్‌లో రాసుకొచ్చారు.

మమ్ముట్టి సొంత బ్యానర్ మమ్ముట్టి కంపెనీ, దుల్కర్ సల్మాన్ వేఫేరర్ ఫిలింస్ సంయుక్తంగా ఈ చిత్రాన్ని నిర్మిస్తున్నాయి. కథ, స్క్రీన్‌ప్లే, మాటలను కె.వి. మోహన్ కుమార్‌తో కలిసి అడూర్ గోపాలకృష్ణన్ స్వయంగా అందించారు. షెహనాద్ జలాల్ సినిమాటోగ్రాఫర్‌గా, ముజీబ్ మజీద్ సంగీత దర్శకుడిగా వ్యవహరిస్తున్నారు. ప్రవీణ్ ప్రభాకర్ ఎడిటింగ్ బాధ్యతలు చేపట్టారు.

ఇదిలావుండగా, మమ్ముట్టి నటిస్తున్న మరో క్రేజీ ప్రాజెక్ట్ 'పేట్రియాట్' గురించి ఆసక్తికరమైన వార్త వినిపిస్తోంది. మోహన్ లాల్ కూడా నటిస్తున్న ఈ మల్టీస్టారర్ చిత్రం ఏప్రిల్ 23న ప్రేక్షకుల ముందుకు వచ్చే అవకాశం ఉన్నట్లు మలయాళ ఇండస్ట్రీ వర్గాల్లో ప్రచారం జరుగుతోంది.