'టీమిండియా' అని పిలవకుండా ఆదేశాలివ్వాలంటూ పిటిషన్... సుప్రీంకోర్టు అసహనం

భారత క్రికెట్ జట్టును 'టీమిండియా' అని పిలవకుండా ఆదేశాలు ఇవ్వాలంటూ దాఖలైన ప్రజా ప్రయోజన వ్యాజ్యం (పిల్)పై సుప్రీంకోర్టు తీవ్ర ఆగ్రహం వ్యక్తం చేసింది. ఇలాంటి అర్థం లేని పిటిషన్లతో న్యాయస్థానం సమయాన్ని వృథా చేయవద్దని పిటిషనర్‌కు గట్టిగా హితవు పలికింది. ఈ వ్యాజ్యాన్ని కొట్టివేస్తున్నట్టు గురువారం స్పష్టం చేసింది.

వివరాల్లోకి వెళితే, న్యాయవాది రీపక్ కన్సల్ సుప్రీంకోర్టులో ఒక పిల్ దాఖలు చేశారు. బోర్డ్ ఆఫ్ కంట్రోల్ ఫర్ క్రికెట్ ఇన్ ఇండియా (బీసీసీఐ) ఒక ప్రైవేటు సంస్థ అని, దానికి చెందిన జట్టును 'టీమిండియా' లేదా 'భారత జాతీయ జట్టు'గా పిలవడం ప్రజలను తప్పుదోవ పట్టించడమేనని ఆయన తన పిటిషన్‌లో పేర్కొన్నారు. ఈ పేరు వినియోగించేందుకు కేంద్ర ప్రభుత్వం నుంచి ఎలాంటి అనుమతి లేదని, కాబట్టి ప్రసార భారతి వంటి సంస్థలు అలా సంబోధించకుండా ఆదేశాలు ఇవ్వాలని కోరారు.

ఈ పిటిషన్‌పై విచారణ సందర్భంగా ధర్మాసనం తీవ్ర అసహనం వ్యక్తం చేసింది. "ఇంట్లో కూర్చుని ఇలాంటి పిటిషన్లు వేస్తుంటారు. అసలు ఆ పేరుతో మీకేం సమస్య? ఆ జట్టు దేశం తరఫున ప్రపంచవ్యాప్తంగా ఆడుతోంది కదా?" అని పిటిషనర్‌ను ప్రశ్నించింది. ఇది పూర్తిగా అర్థం లేని పిటిషన్ అని, దీనివల్ల కోర్టు సమయంతో పాటు మీ సమయం కూడా వృథా అవుతుందని ఘాటుగా వ్యాఖ్యానించింది.

గతంలో ఇదే పిటిషన్‌ను ఢిల్లీ హైకోర్టు కూడా తిరస్కరించిన విషయాన్ని ఈ సందర్భంగా గుర్తుచేయవచ్చు. అప్పుడు కూడా 'టైమ్ వేస్ట్' అని హైకోర్టు వ్యాఖ్యానించింది. తాజాగా సుప్రీంకోర్టు సైతం ఇదే అభిప్రాయాన్ని వ్యక్తం చేస్తూ పిటిషన్‌ను కొట్టివేసింది.