థాంక్యూ థరూర్... దుమారం సద్దుమణిగితే అసలు వాస్తవాలు కనిపిస్తాయి: గంభీర్

టీమిండియా హెడ్ కోచ్ గౌతమ్ గంభీర్ ఆసక్తికర వ్యాఖ్యలు చేశాడు. కాంగ్రెస్ సీనియర్ నేత, ఎంపీ శశి థరూర్ తనకు మద్దతుగా ట్వీట్ చేయగా, దానికి గంభీర్ బదులిచ్చాడు. "డాక్టర్ శశి థరూర్, మీకు చాలా ధన్యవాదాలు. ఈ దుమారం సద్దుమణిగాక, ఒక కోచ్‌కు ఉండే 'అపరిమిత అధికారం' వెనుక ఉన్న నిజానిజాలు, తర్కం స్పష్టమవుతాయి. అప్పటివరకు, అత్యుత్తమమైన నా సొంత వాళ్లతోనే నన్ను పోల్చి చూడటం నాకు వినోదంగా ఉంది" అని గంభీర్ తన ట్వీట్‌లో పేర్కొన్నాడు.

న్యూజిలాండ్‌తో జరిగిన వన్డే సిరీస్‌ను టీమిండియా కోల్పోయిన సంగతి తెలిసిందే. ఈ ఓటమి తర్వాత హెడ్ కోచ్‌గా గంభీర్ తీసుకుంటున్న నిర్ణయాలపై, అతడి వైఖరిపై విమర్శలు వెల్లువెత్తాయి. ఈ నేపథ్యంలో గంభీర్‌కు థరూర్ మద్దతు పలకడం తెలిసిందే.

"నాగ్‌పూర్‌లో నా పాత మిత్రుడు గౌతమ్ గంభీర్‌తో మాట్లాడాను. ప్రధానమంత్రి తర్వాత భారతదేశంలో అత్యంత కష్టమైన ఉద్యోగం ఆయనదే. రోజూ లక్షలాది మంది ఆయనను విమర్శిస్తున్నా, ప్రశాంతంగా, ధైర్యంగా ముందుకు సాగుతున్నారు. ఆయన నిశ్శబ్ద సంకల్పానికి, సమర్థ నాయకత్వానికి అభినందనలు" అని థరూర్ ప్రశంసించారు. ఈ ట్వీట్ పైనే తాజాగా గంభీర్ స్పందించాడు.