భారత విద్యార్థి డిజైన్‌తో రియల్‌మీ కొత్త ఫోన్.. ప్రత్యేకత ఇదే!

స్మార్ట్‌ఫోన్ బ్రాండ్ రియల్‌మీ (realme) తన కొత్త స్మార్ట్‌ఫోన్ 'రియల్‌మీ P4 పవర్'ను మార్కెట్లోకి తీసుకురాబోతోంది. ఈసారి కేవలం ఫీచర్లపైనే కాకుండా, డిజైన్‌పై ప్రత్యేకంగా దృష్టి సారించింది. ముఖ్యంగా నేటి యువతరం (Gen Z) ఆలోచనలకు అద్దం పట్టేలా 'ఫర్ జెన్ Z, బై జెన్ Z' అనే ఫిలాసఫీతో ఈ ఫోన్‌ను రూపొందించింది. ఈ క్రమంలో ప్రముఖ డిజైన్ సంస్థ పెరల్ అకాడమీ విద్యార్థులను భాగస్వాములను చేయడం విశేషం.

ఈ ఫోన్ 'ట్రాన్స్‌వ్యూ డిజైన్' అనే సరికొత్త కాన్సెప్ట్‌తో వస్తోంది. ఫోన్ లోపలి సాంకేతిక భాగాలను దాచిపెట్టకుండా, వాటి స్ఫూర్తితోనే డిజైన్‌ను తీర్చిదిద్దారు. ఫోన్ పైభాగంలో సర్క్యూట్ ప్యాటర్న్‌లు, స్క్రూలతో కూడిన క్రిస్టల్ ప్యానెల్ ఉండగా, కింది భాగంలో మ్యాట్ ఫినిషింగ్‌తో సౌకర్యవంతమైన గ్రిప్‌ను అందిస్తూ, స్టైల్‌ను ప్రతిబింబిస్తుంది. ఈ విధంగా టెక్నాలజీ, సౌకర్యం రెండింటినీ సమపాళ్లలో మేళవించారు.

ఈ డిజైన్ రూపకల్పనలో రియల్‌మీ మరో అడుగు ముందుకేసి, పెరల్ అకాడమీ విద్యార్థులతో కలిసి పనిచేసింది. వర్క్‌షాప్‌లు నిర్వహించి, వారి ఆలోచనలు, స్కెచ్‌లను స్వీకరించింది. వారిలో సంకల్ప్ పాంచాల్ అనే విద్యార్థి అందించిన డిజైన్ కాన్సెప్ట్‌ను తుది ఉత్పత్తిలో భాగం చేసింది. ఒక మాస్ మార్కెట్ స్మార్ట్‌ఫోన్ డిజైన్‌లో విద్యార్థుల ఆలోచనలకు నేరుగా చోటు కల్పించడం ఇదే తొలిసారి.

ప్రస్తుత జెన్ Z యువతకు స్మార్ట్‌ఫోన్ కేవలం ఒక పరికరం కాదు, వారి వ్యక్తిత్వానికి, సృజనాత్మకతకు నిదర్శనం. వారు పనితీరుతో పాటు స్టైల్, డిజైన్‌కు కూడా అంతే ప్రాధాన్యం ఇస్తున్నారు. ఈ మార్పును గమనించిన రియల్‌మీ, తన P సిరీస్‌ను భారతీయ యువత అభిరుచులకు అనుగుణంగా మారుస్తూ వస్తోంది. ఈ కొత్త ఆవిష్కరణ ద్వారా, రియల్‌మీ యువతను కేవలం వినియోగదారులుగా కాకుండా, తమ ఉత్పత్తుల రూపకల్పనలో భాగస్వాములుగా చూస్తోందని స్పష్టం చేసింది.