చిరు హుక్ స్టెప్‌కు ఫిదా.. సోషల్ మీడియాను షేక్ చేస్తున్న బామ్మలు!

మెగాస్టార్ చిరంజీవి నటించిన 'మన శంకరవరప్రసాద్ గారు' సంక్రాంతి కానుకగా విడుదలై బాక్సాఫీస్ వద్ద కలెక్షన్ల వర్షం కురిపిస్తోంది. ఈ నెల‌ 12న ప్రేక్షకుల ముందుకు వచ్చిన ఈ చిత్రం, విడుదలైన ఐదు రోజుల్లోనే రూ.226 కోట్లకు పైగా గ్రాస్ వసూలు చేసి, ఇప్పుడు రూ.300 కోట్ల మార్క్ వైపు దూసుకెళ్తోంది. ఫ్యామిలీ, మాస్ ఆడియన్స్‌ను ఏకకాలంలో ఆకట్టుకుంటోంది.

సినిమాలో చిరంజీవి వింటేజ్ కామెడీ, యాక్షన్ సన్నివేశాలు ప్రేక్షకులను అలరిస్తున్నా, అందరినీ ఎక్కువగా కట్టిపడేస్తున్న అంశం మాత్రం ఆయన డ్యాన్స్. ముఖ్యంగా ఓ పాటలో ఆయన వేసిన హుక్ స్టెప్ థియేటర్లలోనే కాకుండా, సోషల్ మీడియాలోనూ ఓ రేంజ్‌లో ట్రెండ్ అవుతోంది. సామాన్యుల నుంచి సెలబ్రిటీల వరకు చిన్నా పెద్దా తేడా లేకుండా ఈ స్టెప్పును అనుకరిస్తూ ఇన్‌స్టాగ్రామ్ రీల్స్, షార్ట్స్ చేస్తున్నారు.

ఇటీవల ఇద్దరు బామ్మలు మొబైల్ ఫోన్ లైట్ వేసుకుని ఉత్సాహంగా ఈ పాటకు డ్యాన్స్ చేసిన వీడియో సోషల్ మీడియాలో వైరల్‌గా మారింది. "డ్యాన్స్‌కు వయసు అడ్డుకాదు" అంటూ నెటిజన్లు వారిని ప్రశంసిస్తున్నారు.

ఈ చిత్రానికి అనిల్ రావిపూడి దర్శకత్వం వహించగా, చిరంజీవి సరసన నయనతార హీరోయిన్‌గా నటించారు. విక్టరీ వెంకటేశ్‌ కీలక పాత్రలో కనిపించగా, క్యాథరీన్ థెరీసా, సచిన్ ఖేడ్కర్ తదితరులు ఇతర ముఖ్య పాత్రలు పోషించారు. భీమ్స్ అందించిన సంగీతం సినిమా విజయంలో ప్రధాన పాత్ర పోషించింది. షైన్ స్క్రీన్స్, గోల్డ్ బాక్స్ ఎంటర్‌టైన్‌మెంట్స్ పతాకాలపై సాహు గారపాటి, సుష్మిత కొణిదెల ఈ చిత్రాన్ని నిర్మించారు. ప్రస్తుతం థియేటర్లలో హౌస్‌ఫుల్ కలెక్షన్లతో ప్రదర్శితమవుతున్న ఈ సినిమా, రానున్న రోజుల్లో మరిన్ని రికార్డులు సృష్టించే అవకాశం ఉందని ట్రేడ్ వర్గాలు చెబుతున్నాయి.