డ్యూటీ ఎక్కేందుకు ససేమిరా అన్న ఇండిగో పైలట్... విమానం నిలిచిపోవడంతో ప్రయాణికుల ఆగ్రహం

ముంబై నుంచి థాయ్‌లాండ్‌లోని క్రాబీకి వెళ్లాల్సిన ఇండిగో విమానంలో గురువారం తీవ్ర గందరగోళం నెలకొంది. తన డ్యూటీ సమయం ముగిసిపోవడంతో విమానాన్ని నడిపేందుకు పైలట్ నిరాకరించడమే ఇందుకు కారణం. దీంతో గంటల తరబడి విమానం కదలకపోవడంతో ప్రయాణికుల ఆగ్రహం కట్టలు తెంచుకుంది. ఈ ఘటనకు సంబంధించిన వీడియో సోషల్ మీడియాలో వైరల్‌గా మారింది.

వివరాల్లోకి వెళితే, ఇండిగో ఫ్లైట్ 6E 1085 గురువారం ఉదయం 4:05 గంటలకు ముంబై నుంచి బయలుదేరాల్సి ఉంది. అయితే, మరో విమానం ఆలస్యంగా రావడం, ఎయిర్ ట్రాఫిక్ రద్దీ వంటి కారణాలతో ఇది ఇప్పటికే మూడు గంటలకు పైగా ఆలస్యమైంది. ప్రయాణికులను విమానంలోకి ఎక్కించిన తర్వాత కూడా టేకాఫ్ కాకపోవడంతో వారి సహనం నశించింది. డ్యూటీ సమయం ముగిసిందని పైలట్ చెప్పడంతో వారు సిబ్బందితో తీవ్ర వాగ్వాదానికి దిగారు.

సోషల్ మీడియా వీడియోల ప్రకారం, కొందరు ప్రయాణికులు "పైలట్ ఎలుకలా ఎందుకు దాక్కుంటున్నాడు?" అని అరవగా, మరొకరు విమానం డోర్‌ను కాలితో తన్నుతూ కనిపించారు. పైలట్‌పై దాడి చేయాలంటూ కొందరు మాట్లాడుకోవడం కూడా కలకలం రేపింది.

ఈ ఘటనపై ఇండిగో సంస్థ ఒక ప్రకటన విడుదల చేసింది. భద్రతా నిబంధనల ప్రకారం పైలట్ డ్యూటీ సమయం ముగియడంతో విమానం నడపలేదని స్పష్టం చేసింది. వేచి ఉన్న సమయంలో ప్రయాణికులకు ఆహారం, ఇతర సదుపాయాలు అందించామని పేర్కొంది. అయితే, అనుచితంగా ప్రవర్తించిన ఇద్దరు ప్రయాణికులను విమానం నుంచి దించివేసి భద్రతా సిబ్బందికి అప్పగించినట్లు తెలిపింది. ఈ ప్రక్రియ వల్ల విమానం మరింత ఆలస్యమైంది. చివరికి ఆ విమానం మధ్యాహ్నం 1 గంట సమయంలో క్రాబీలో సురక్షితంగా ల్యాండ్ అయింది. ప్రయాణికులకు కలిగిన అసౌకర్యానికి ఇండిగో విచారం వ్యక్తం చేసింది.