అంబర్‌పేట్ ఎస్ఐ భానుప్రకాశ్‌రెడ్డి అరెస్ట్

అంబర్‌పేట్ పోలీస్ స్టేషన్‌లో పనిచేస్తున్న సబ్ ఇన్‌స్పెక్టర్ (ఎస్ఐ) భానుప్రకాశ్‌రెడ్డిని పోలీసులు అరెస్ట్ చేశారు. బెట్టింగ్ వ్యసనానికి బానిసై, అప్పులు తీర్చేందుకు కేసుల్లో రికవరీ చేసిన సొత్తును దుర్వినియోగం చేయడంతో పాటు తన సర్వీస్ రివాల్వర్‌ను పోగొట్టుకున్నారన్న తీవ్ర ఆరోపణలపై ఆయనపై కేసు నమోదైంది.  

పోలీసులు తెలిపిన వివరాల ప్రకారం.. ఎస్ఐ భానుప్రకాశ్‌రెడ్డి కొంతకాలంగా ఆన్‌లైన్ బెట్టింగ్‌లకు బానిసై భారీగా అప్పులు చేశారు. వాటిని తీర్చే మార్గంలేక, తాను విచారిస్తున్న కేసుల్లో భాగంగా రికవరీ చేసిన సొత్తును తాకట్టు పెట్టి, దుర్వినియోగం చేసినట్లు విచారణలో తేలింది. ఈ విషయంపై ఉన్నతాధికారులు దర్యాప్తు చేపట్టగా అక్రమాలు వెలుగులోకి వచ్చాయి.

ఇదే క్రమంలో అత్యంత బాధ్యతాయుతంగా కాపాడుకోవాల్సిన తన సర్వీస్ రివాల్వర్‌ను కూడా భానుప్రకాశ్‌రెడ్డి పోగొట్టుకున్నారు. దీనిపై అధికారులు ప్రశ్నించగా, తొలుత రైలులో పోయిందంటూ పొంతనలేని సమాధానాలు చెప్పారు. అయితే, విచారణలో ఒత్తిడి పెరగడంతో చివరకు రివాల్వర్ పోగొట్టుకున్నట్లు అంగీకరించారు.

ఆరోపణలు ప్రాథమికంగా రుజువు కావడంతో పోలీసులు భానుప్రకాశ్‌రెడ్డిని అరెస్ట్ చేసి కోర్టులో హాజరుపరిచారు. న్యాయస్థానం ఆదేశాల మేరకు ఆయన్ను రిమాండ్ నిమిత్తం చంచల్‌గూడ జైలుకు తరలించారు.

కాగా, భానుప్రకాశ్‌రెడ్డి ఇటీవల ఆంధ్రప్రదేశ్ గ్రూప్-2 ఉద్యోగానికి ఎంపికయ్యారు. తెలంగాణలో ఎస్ఐ ఉద్యోగానికి రాజీనామా చేసి, ఏపీలో కొత్త కొలువులో చేరేందుకు దరఖాస్తు చేసుకున్నారు. ఈ ప్రక్రియ జరుగుతుండగానే ఆయన చేసిన అక్రమాలు బయటపడటం గమనార్హం. రక్షకభటుడే భక్షకుడిగా మారిన ఈ ఉదంతం తెలుగు రాష్ట్రాల్లో చర్చనీయాంశంగా మారింది.