మాటలతో వినకపోతే బలప్రయోగమే.. గ్రీన్‌ల్యాండ్‌ను స్వాధీనం చేసుకుంటాం: ట్రంప్

అమెరికా అధ్యక్షుడు డొనాల్డ్ ట్రంప్ మరోసారి సంచలన వ్యాఖ్యలు చేశారు. ఆర్కిటిక్ ప్రాంతంలోని గ్రీన్‌ల్యాండ్‌ను స్వాధీనం చేసుకునేందుకు బలప్రయోగానికైనా వెనుకాడబోమని స్పష్టం చేశారు. డెన్మార్క్‌కు చెందిన ఈ స్వయంప్రతిపత్తి గల ద్వీపంపై ఆ దేశ సార్వభౌమత్వాన్ని ఆయన తోసిపుచ్చారు. నిన్న‌ వైట్‌హౌస్‌లో చమురు సంస్థల ప్రతినిధులతో జరిగిన సమావేశంలో ట్రంప్ ఈ వ్యాఖ్యలు చేశారు.

"డెన్మార్క్‌కు నచ్చినా నచ్చకపోయినా, గ్రీన్‌ల్యాండ్ విషయంలో మేం ఏదో ఒకటి చేయబోతున్నాం. సులభమైన మార్గంలో ఒప్పందం చేసుకోవడానికే నేను ఇష్టపడతాను. కానీ, ఆ మార్గంలో పని జరగకపోతే, కఠినమైన మార్గాన్ని ఎంచుకుంటాం" అని ట్రంప్ హెచ్చరించారు. ఆర్కిటిక్‌లో రష్యా, చైనాల సైనిక కార్యకలాపాలు పెరుగుతున్నాయని, అమెరికా జాతీయ భద్రతకు గ్రీన్‌ల్యాండ్‌ను నియంత్రించడం చాలా కీలకమని ఆయన అన్నారు.

"మనం ఏమీ చేయకపోతే రష్యా లేదా చైనా గ్రీన్‌ల్యాండ్‌ను ఆక్రమిస్తాయి. దానిని మేం జరగనివ్వం. అందుకే మంచిమాటలతో లేదా మరో కఠిన మార్గంలోనో గ్రీన్‌ల్యాండ్‌తో ఏదో ఒకటి చేస్తాం" అని ట్రంప్ వివరించారు. ట్రంప్ బెదిరింపులపై డెన్మార్క్, ఇతర యూరప్ దేశాలు తీవ్ర దిగ్భ్రాంతి వ్యక్తం చేశాయి. గ్రీన్‌ల్యాండ్‌పై దాడి జరిగితే నాటో సహా రెండో ప్రపంచ యుద్ధం తర్వాత ఏర్పడిన భద్రతా వ్యవస్థ మొత్తం కూలిపోతుందని డెన్మార్క్ ప్రధాని మెట్టె ఫ్రెడరిక్సెన్ హెచ్చరించారు.

అయితే, ఈ ఆందోళనలను ట్రంప్ తేలిగ్గా తీసుకున్నారు. "500 ఏళ్ల క్రితం వాళ్ల పడవ అక్కడికి చేరినంత మాత్రాన ఆ భూమి వాళ్లది అయిపోదు కదా" అని వ్యాఖ్యానించారు. ఈ వివాదంపై చర్చించేందుకు అమెరికా విదేశాంగ మంత్రి మార్కో రూబియో వచ్చే వారం డెన్మార్క్, గ్రీన్‌ల్యాండ్ ప్రతినిధులతో సమావేశం కానున్నారు.