ఉదయం నుంచి ఒడిదుడుకులు... స్వల్ప నష్టాల్లో ముగిసిన స్టాక్ మార్కెట్లు

దేశీయ స్టాక్ మార్కెట్లు నేడు తీవ్ర ఒడిదుడుకుల మధ్య సాగి చివరకు ఫ్లాట్‌గా ముగిశాయి. ఉదయం నుంచి మదుపర్లు ఆచితూచి వ్యవహరించడంతో సూచీలు దిశలేని స్థితిలో కదిలాయి. కొన్ని రంగాల్లో కొనుగోళ్ల మద్దతు లభించినా, మరికొన్ని రంగాల్లో అమ్మకాల ఒత్తిడి కారణంగా మార్కెట్లు స్వల్ప నష్టాలను నమోదు చేశాయి.

సెన్సెక్స్ 20.46 పాయింట్ల స్వల్ప నష్టంతో 84,675.08 వద్ద ముగియగా, నిఫ్టీ 3.25 పాయింట్లు కోల్పోయి 25,938.85 వద్ద స్థిరపడింది. ప్రధానంగా ఐటీ, ఎఫ్‌ఎంసీజీ, రియల్టీ, ఫార్మా రంగాల షేర్లలో అమ్మకాల ఒత్తిడి స్పష్టంగా కనిపించింది. మరోవైపు పీఎస్‌యూ బ్యాంకులు, మెటల్, ఆటో రంగాల షేర్లు లాభపడటంతో మార్కెట్లకు కొంత ఊరట లభించింది. నిఫ్టీ మెటల్ ఇండెక్స్ 2 శాతానికి పైగా, పీఎస్‌యూ బ్యాంక్ ఇండెక్స్ 1.69 శాతం మేర లాభపడ్డాయి.

సెన్సెక్స్ ప్యాక్‌లో ఎం అండ్ ఎం, టాటా స్టీల్, బజాజ్ ఫిన్‌సర్వ్, యాక్సిస్ బ్యాంక్ షేర్లు లాభాల్లో ముగిసి మార్కెట్‌కు అండగా నిలిచాయి. ఇదే సమయంలో ఇన్ఫోసిస్, ఏషియన్ పెయింట్స్, అల్ట్రాటెక్ సిమెంట్, బజాజ్ ఫైనాన్స్ వంటి దిగ్గజ షేర్లు నష్టాలను చవిచూశాయి. విస్తృత మార్కెట్లలోనూ బలహీనత కనిపించింది. నిఫ్టీ మిడ్‌క్యాప్ 100 సూచీ 0.15 శాతం, స్మాల్‌క్యాప్ 100 సూచీ 0.28 శాతం చొప్పున నష్టపోయాయి.

మార్కెట్ గమనంపై నిపుణులు స్పందిస్తూ.. నిఫ్టీ 21 రోజుల ఈఎంఏ దిగువకు పడిపోవడం స్వల్పకాలిక డౌన్‌ట్రెండ్‌ను సూచిస్తోందని పేర్కొన్నారు. నిఫ్టీకి 25,850–25,870 పాయింట్ల వద్ద తక్షణ మద్దతు లభించే అవకాశం ఉందని, 26,000 పాయింట్ల వద్ద నిరోధం ఉందని విశ్లేషించారు. దిగువ స్థాయిల వద్ద జరిగిన కొనుగోళ్లు, బ్యాంకింగ్, ఆటో షేర్లలో షార్ట్ కవరింగ్ కారణంగా మార్కెట్ ఇంట్రాడే నష్టాల నుంచి కోలుకోగలిగిందని తెలిపారు.