అలాంటి సలహాలు ఇచ్చే వ్యక్తులను ఇన్వెస్టర్లు నమ్మొద్దు: బీఎస్ఈ

స్టాక్ మార్కెట్లో అనధికారికంగా పెట్టుబడి సలహాలు ఇస్తూ, నిబంధనలకు విరుద్ధంగా వ్యవహరిస్తున్న వ్యక్తుల పట్ల అప్రమత్తంగా ఉండాలని బాంబే స్టాక్ ఎక్స్ఛేంజ్ (BSE) మంగళవారం మదుపరులను హెచ్చరించింది. ముఖ్యంగా ఆదిత్య రిషబ్ మిశ్రా అనే వ్యక్తి సెబీ (SEBI) రిజిస్ట్రేషన్ లేకుండానే ట్రేడింగ్ సిఫార్సులు, అకౌంట్ హ్యాండ్లింగ్ సేవలు అందిస్తున్నారని బీఎస్‌ఈ ఒక అధికారిక ప్రకటనలో తెలిపింది.

ఆదిత్య రిషబ్ మిశ్రా లేదా అతనికి సంబంధించిన సంస్థలు బీఎస్‌ఈలో రిజిస్టర్ అయిన సభ్యులు కాదని, అలాగే ఏ సభ్యుని వద్ద కూడా అధికారిక ప్రతినిధులుగా లేరని స్పష్టం చేసింది. ఇటువంటి వ్యక్తులు అందించే ఉత్పత్తులు లేదా సేవలకు దూరంగా ఉండాలని ఇన్వెస్టర్లకు సూచించింది. మదుపరులు తమ ట్రేడింగ్ ఖాతాలకు సంబంధించిన యూజర్ ఐడీ, పాస్‌వర్డ్ వంటి కీలక వివరాలను ఎట్టి పరిస్థితుల్లోనూ ఇతరులతో పంచుకోవద్దని బీఎస్‌ఈ గట్టిగా కోరింది.

ఇలాంటి అనధికారిక స్కీమ్‌లలో పెట్టుబడులు పెట్టడం వల్ల భారీ ఆర్థిక నష్టాలు వచ్చే ప్రమాదం ఉందని, ఒకవేళ నష్టం జరిగితే ఇన్వెస్టర్ ప్రొటెక్షన్ ఫండ్ ద్వారా గానీ, డిస్ప్యూట్ రెజల్యూషన్ ద్వారా గానీ ఎలాంటి రక్షణ లభించదని హెచ్చరించింది. స్టాక్ బ్రోకర్లు, ఇన్వెస్ట్‌మెంట్ అడ్వైజర్లు (IA), లేదా రీసెర్చ్ అనలిస్టుల (RA) రిజిస్ట్రేషన్ వివరాలను ఎక్స్ఛేంజ్ వెబ్‌సైట్‌లో తనిఖీ చేసుకోవాలని సూచించింది.

ఇటీవల కాలంలో నకిలీ సెబీ రిజిస్ట్రేషన్ సర్టిఫికెట్లతో అమాయక మదుపరులను మోసగిస్తున్న ఘటనలు పెరుగుతున్న నేపథ్యంలో, సెబీ కూడా పలుమార్లు హెచ్చరికలు జారీ చేసింది. మార్కెట్ దుర్వినియోగాన్ని అరికట్టేందుకు సెబీ ఒక ప్రత్యేక పోర్టల్‌ను కూడా అభివృద్ధి చేసింది. రిజిస్టర్డ్ మధ్యవర్తులు ఎవరూ కూడా అనధికారిక వ్యక్తులతో ప్రత్యక్షంగా లేదా పరోక్షంగా ఎలాంటి సంబంధాలు కలిగి ఉండకూడదని సెబీ ఇప్పటికే స్పష్టమైన ఆదేశాలు జారీ చేసిన విషయం తెలిసిందే.