విశాఖలో నేవీ అధికారి హల్చల్... మద్యం మత్తులో పోలీసులతో జగడం... వీడియో ఇదిగో!

విశాఖపట్నంలో ఓ నావికాదళ అధికారి మద్యం మత్తులో వీరంగం సృష్టించారు. విధుల్లో ఉన్న పోలీసులతో దురుసుగా ప్రవర్తించడమే కాకుండా, వారిపై దాడికి యత్నించారు. తూర్పు నావికా దళంలో లెఫ్టినెంట్ కమాండర్‌గా పనిచేస్తున్న రాహుల్ కృష్ణన్ ఈ ఘటనకు పాల్పడినట్లు పోలీసులు గుర్తించారు.

వివరాల్లోకి వెళితే, విశాఖలోని సింధియా రోడ్డులో పైప్‌లైన్ పనులు జరుగుతుండటంతో పోలీసులు ట్రాఫిక్‌ను మళ్లించారు. ఆ సమయంలో మద్యం సేవించి కారు నడుపుతూ అటుగా వచ్చిన రాహుల్ కృష్ణన్ ను పోలీసులు ఆపేందుకు ప్రయత్నించారు. అయితే, ఆయన కారును ఆపకుండా వేగంగా ముందుకు పోనిచ్చారు.

వెంటనే స్పందించిన పోలీసులు, అతడిని వెంబడించి పట్టుకోవడంతో వారిపై తీవ్ర ఆగ్రహం వ్యక్తం చేశారు. "నన్నే ఆపుతారా?" అంటూ పోలీసులతో వాగ్వాదానికి దిగి, దాడికి ప్రయత్నించారు. ఆయన ప్రవర్తనను అక్కడి సిబ్బంది తమ సెల్‌ఫోన్లలో రికార్డ్ చేశారు.

పోలీసులు ఆయనకు నచ్చజెప్పే ప్రయత్నం చేసినా ఫలితం లేకపోయింది. దీంతో దృశ్య సాక్ష్యాల (విజువల్ ఎవిడెన్స్) ఆధారంగా కేసు నమోదు చేసి దర్యాప్తు చేస్తున్నారు. బాధ్యతాయుతమైన హోదాలో ఉన్న అధికారి ఇలా ప్రవర్తించడంపై స్థానికంగా విమర్శలు వ్యక్తమవుతున్నాయి.