తెల్లవాళ్లు కాకుండా, ఇతరులు హాలీవుడ్ లో రాణించడం కష్టమే: సిము ల్యూ

మార్వెల్ సినిమా 'షాంగ్-చి అండ్ ది లెజెండ్ ఆఫ్ ది టెన్ రింగ్స్'తో ప్రపంచవ్యాప్తంగా గుర్తింపు పొందిన హాలీవుడ్ నటుడు సిము ల్యూ సంచలన వ్యాఖ్యలు చేశారు. హాలీవుడ్‌లో శ్వేతజాతీయులు (తెల్లవాళ్లు) కాని వారికి విజయం సాధించడం చాలా కష్టమని ఆయన అన్నారు. భారీ విజయం అందుకున్నప్పటికీ, తన కెరీర్ ఇప్పటికీ ఓ ఎత్తుపల్లాలుగానే సాగుతోందని ఆవేదన వ్యక్తం చేశారు.

'షాంగ్-చి' వంటి బ్లాక్‌బస్టర్ తర్వాత తనకు ప్రధాన పాత్రల్లో అవకాశాలు పెద్దగా రాలేదని సిము ఆశ్చర్యం వ్యక్తం చేశారు. తన వద్దకు వస్తున్న అవకాశాలు చాలా తక్కువ బడ్జెట్ సినిమాలని, అందులో కూడా మూడో లేదా నాలుగో ప్రాధాన్యత ఉన్న పాత్రలు, లేదా విలన్ పాత్రలు ఉంటున్నాయని తెలిపారు.

ఒకవేళ తన స్థానంలో వేరే శ్వేతజాతీయుడైన నటుడు ఉండి ఉంటే, అతనికి మరిన్ని మంచి అవకాశాలు, అదీ చాలా వేగంగా వచ్చి ఉండేవని సిము అభిప్రాయపడ్డారు. "హాలీవుడ్ వ్యవస్థ ఒక నిర్దిష్ట రకమైన నటులకే అనుకూలంగా ఉంటుంది. వారికి ఒక్క అవకాశం వస్తే చాలు, ఆ తర్వాత వరుసగా అవకాశాలు సులభంగా వస్తాయి. కానీ నా విషయంలో అలా జరగలేదు" అని ఆవేదన వ్యక్తం చేశారు.

తన కెరీర్‌లో ప్రతీ రోజూ ఒక పెద్ద యుద్ధంలాగే పోరాడాల్సి వస్తోందని సిము అన్నారు. తన దగ్గరకు వస్తున్న స్క్రిప్టులు తనకు సరైనవిగా అనిపించడం లేదని, ఇంకా మెరుగైనవి రావాలని కోరుకుంటున్నట్లు చెప్పారు. ఈ కారణంతోనే చాలా మంది ఆసియా నటులు సొంతంగా దర్శకత్వం, నిర్మాణం వైపు వెళుతున్నారని ఆయన పేర్కొన్నారు.