స్నికో టెక్నాలజీ ఫెయిల్.. యాషెస్‌లో ముదురుతున్న వివాదం

ప్రతిష్ఠాత్మక యాషెస్ సిరీస్‌లో డెసిషన్ రివ్యూ సిస్టమ్ (డీఆర్‌ఎస్) పెను వివాదానికి దారి తీసింది. ఎడ్జ్ డిటెక్షన్ కోసం ఉపయోగించే 'స్నికో' టెక్నాలజీ వరుసగా రెండు రోజుల పాటు తప్పుడు నిర్ణయాలకు కారణమవడంతో ఆటగాళ్లు, మాజీ క్రికెటర్ల నుంచి తీవ్ర విమర్శలు వెల్లువెత్తుతున్నాయి.

రెండో రోజు ఆటలో ఇంగ్లండ్ బ్యాటర్ జేమీ స్మిత్ ఔటైన తీరు వివాదాస్పదమైంది. కమిన్స్ బౌలింగ్‌లో బంతి బ్యాట్‌ను దాటి వెళ్లిన తర్వాత స్నికో మీటర్‌లో స్పైక్ కనిపించినప్పటికీ, థర్డ్ అంపైర్ క్రిస్ గఫానే ఔట్‌గా ప్రకటించారు. బంతికి, బ్యాట్‌కు మధ్య స్పష్టమైన గ్యాప్ కనిపించడంతో స్మిత్, స్టోక్స్ అసహనం వ్యక్తం చేశాడు.

అంతకుముందు రోజు కూడా ఇదే టెక్నాలజీ వల్ల ఆస్ట్రేలియా బ్యాటర్ అలెక్స్ కేరీకి లైఫ్ లభించింది. బంతి బ్యాట్‌కు తగిలినా స్నికోలో స్పైక్ సరైన సమయంలో రాకపోవడంతో నాటౌట్‌గా ప్రకటించారు. అయితే, తమ ఆపరేటర్ పొరపాటు వల్లే ఈ తప్పిదం జరిగిందని స్నికో టెక్నాలజీని అందించే బీబీజీ స్పోర్ట్స్ సంస్థ అంగీకరించి, క్షమాపణలు చెప్పింది.

ఈ వరుస తప్పిదాలపై ఆస్ట్రేలియా పేసర్ మిచెల్ స్టార్క్ తీవ్రంగా స్పందించాడు. "స్నికోను తక్షణమే తొలగించాలి. అదొక పనికిరాని టెక్నాలజీ" అంటూ స్టంప్ మైక్‌లో అసహనం వ్యక్తం చేశాడు. ఈ టెక్నాలజీపై నమ్మకం లేదని, ఇతర దేశాల్లో వాడే టెక్నాలజీతో పోలిస్తే ఇది నాసిరకంగా ఉందని మాజీ కెప్టెన్ రికీ పాంటింగ్ కూడా విమర్శించారు. ఈ పరిణామాలతో క్రికెట్ ఆస్ట్రేలియా, ఇంగ్లండ్ క్రికెట్ బోర్డు (ఈసీబీ) అసంతృప్తి వ్యక్తం చేశాయి. ఐసీసీ నిబంధనలను సమీక్షించాలని ఈసీబీ కోరనుంది. మొత్తం మీద ఈ వివాదం డీఆర్‌ఎస్‌ విశ్వసనీయతనే ప్రశ్నార్థకం చేస్తోంది.