కేరళలో పేరడీ పాటపై కేసు.. రాజకీయ దుమారం!

కేరళ స్థానిక సంస్థల ఎన్నికల ప్రచారంలో వైరల్‌గా మారిన "పొట్టియే కెట్టియే" అనే పేరడీ పాట తీవ్ర వివాదానికి దారితీసింది. ఈ పాటపై వచ్చిన ఫిర్యాదు మేరకు తిరువనంతపురం సైబర్ పోలీసులు బుధవారం కేసు నమోదు చేశారు. గీత రచయితతో సహా మొత్తం నలుగురిని నిందితులుగా పేర్కొన్నారు.

ఓ భక్తిగీతాన్ని దుర్వినియోగం చేస్తూ తమ మతపరమైన మనోభావాలను దెబ్బతీశారని తిరువాభరణ పథ సంరక్షణ సమితి ప్రధాన కార్యదర్శి ప్రసాద్ కుళిక్కల పోలీసులకు ఫిర్యాదు చేశారు. న్యాయ సలహా తీసుకున్న తర్వాతే మత ఘర్షణలను ప్రోత్సహించడం, మనోభావాలను గాయపరచడం వంటి అభియోగాల కింద కేసు నమోదు చేసినట్లు పోలీసులు తెలిపారు. ఈ పేరడీ పాటను ఎన్నికల ప్రచారంలో యూడీఎఫ్ కూటమి విస్తృతంగా ఉపయోగించింది.

ఈ ఘటనపై సీపీఎం, కాంగ్రెస్ మధ్య మాటల యుద్ధం మొదలైంది. ఈ పాట ఎన్నికల నియమావళిని ఉల్లంఘించిందని ఆరోపిస్తూ ఎన్నికల సంఘానికి ఫిర్యాదు చేసేందుకు సీపీఎం సిద్ధమవుతోంది. అయితే, సీపీఎం చర్యను కాంగ్రెస్ నేత పీసీ విష్ణునాథ్ తీవ్రంగా విమర్శించారు. "ఒక పాటకు సీపీఎం భయపడే పరిస్థితికి వచ్చిందా? పేరడీ పాటపై ఫిర్యాదు చేయడం ఆ పేరడీ కన్నా పెద్ద కామెడీ" అని ఆయన ఎద్దేవా చేశారు.

మరోవైపు, భావప్రకటనా స్వేచ్ఛ విషయంలో సీపీఎం ద్వంద్వ వైఖరి అవలంబిస్తోందని సోషల్ మీడియాలో విమర్శలు వెల్లువెత్తుతున్నాయి. గతంలో రచయితలకు మద్దతుగా నిలిచిన ముఖ్యమంత్రి పినరయి విజయన్ ఇప్పుడు ఈ విషయంలో మౌనంగా ఉండటాన్ని నెటిజన్లు ప్రశ్నిస్తున్నారు.