ఐపీఎల్ వేలంలో చాలామందికి తెలియని రెండు కీలక నియమాలు

ఐపీఎల్ 2026 మినీ వేలానికి రంగం సిద్ధమైంది. కామెరూన్ గ్రీన్, లియామ్ లివింగ్‌స్టోన్ వంటి స్టార్ ఆటగాళ్లు వేలంలో ఉండటంతో ఫ్రాంచైజీల మధ్య తీవ్రమైన పోటీ నెలకొంది. అయితే, ఉత్కంఠభరితంగా సాగే ఈ వేలం ప్రక్రియలో చాలామందికి తెలియని రెండు కీలక నియమాలు ఉన్నాయి. అవే 'సైలెంట్ టై బ్రేకర్', 'యాక్సిలరేటెడ్ రౌండ్'. వీటిని అర్థం చేసుకుంటేనే వేలం అసలు స్వరూపం తెలుస్తుంది.

సైలెంట్ టై బ్రేకర్ అంటే ఏమిటి?
ఐపీఎల్ వేలంలో అత్యంత నాటకీయమైన నిబంధన ఇది. ఒకే ఆటగాడి కోసం రెండు లేదా అంతకంటే ఎక్కువ జట్లు తమ పర్సులో ఉన్న పూర్తి డబ్బును వెచ్చించి సమానంగా నిలిచినప్పుడు ఈ నిబంధన అమల్లోకి వస్తుంది. అప్పుడు ఆ ఫ్రాంచైజీలు ఒక సీల్డ్ కవర్‌లో రహస్యంగా ఒక మొత్తాన్ని రాసి బీసీసీఐకి సమర్పిస్తాయి. ఏ జట్టు ఎక్కువ మొత్తం రాస్తే, ఆ ఆటగాడు వారికే దక్కుతాడు.

ఇక్కడే అసలు ట్విస్ట్ ఉంటుంది. అదనంగా చెల్లించే మొత్తం ఆటగాడి జీతంలోకి వెళ్లదు. అది నేరుగా బీసీసీఐకే చెందుతుంది. ఉదాహరణకు రెండు జట్లు ఒక ఆటగాడిపై రూ.18 కోట్లతో సమానంగా నిలిస్తే, ఒక ఫ్రాంచైజీ సీల్డ్ కవర్‌లో రూ.22 కోట్లు, మరొకటి రూ.23 కోట్లు రాశాయనుకుందాం. అప్పుడు రూ.23 కోట్లు రాసిన జట్టుకు ఆటగాడు దక్కుతాడు. కానీ, ఆటగాడికి అందే జీతం మాత్రం రూ.18 కోట్లే. మిగిలిన రూ.5 కోట్లు బీసీసీఐకి వెళ‌తాయి. 2010లో కీరన్ పోలార్డ్, షేన్ బాండ్, 2012లో రవీంద్ర జడేజాలను ఫ్రాంచైజీలు ఈ పద్ధతిలోనే దక్కించుకున్నాయి.

యాక్సిలరేటెడ్ రౌండ్
ఐపీఎల్ 2026 మినీ వేలంలో 70 మంది ఆటగాళ్ల బిడ్డింగ్ పూర్తయ్యాక ఈ రౌండ్ ప్రారంభమవుతుంది. తొలి దశలో అమ్ముడుపోని ఆటగాళ్ల జాబితా నుంచి ఫ్రాంచైజీలు కోరిన కొందరిని మళ్లీ వేలంలోకి తీసుకొస్తారు. ఈ దశలోనే చాలా ఫ్రాంచైజీలు తక్కువ ధరకు మ్యాచ్ విన్నర్లను కొనుగోలు చేసి తమ జట్లను బలోపేతం చేసుకుంటాయి. ఈ రెండు నియమాలు ఐపీఎల్ వేలాన్ని మరింత ఆసక్తికరంగా, వ్యూహాత్మకంగా మార్చడంలో కీలక పాత్ర పోషిస్తాయి.