యూఎస్ ఫెడ్ భేటీ ఎఫెక్ట్: నష్టాల్లో ముగిసిన సెన్సెక్స్, నిఫ్టీ

అమెరికా ఫెడరల్ రిజర్వ్ కీలక వడ్డీ రేట్లపై నిర్ణయం ప్రకటించనున్న నేపథ్యంలో దేశీయ స్టాక్ మార్కెట్లు బుధవారం నష్టాల్లో ముగిశాయి. ఇన్వెస్టర్లు ఆచితూచి వ్యవహరించడంతో అమ్మకాల ఒత్తిడి నెలకొంది. ట్రేడింగ్ ముగిసే సమయానికి సెన్సెక్స్ 275.01 పాయింట్ల నష్టంతో 84,391.27 వద్ద స్థిరపడింది. నిఫ్టీ కూడా 81.65 పాయింట్లు కోల్పోయి 25,758 వద్ద ముగిసింది.

మార్కెట్ విశ్లేషకుల ప్రకారం, నిఫ్టీకి 25,940–26,050 జోన్‌లో బలమైన నిరోధం ఎదురవుతోంది. మార్కెట్ మళ్లీ పుంజుకోవాలంటే 26,000 స్థాయిని కచ్చితంగా దాటాల్సి ఉంటుందని వారు అభిప్రాయపడుతున్నారు. ఒకవేళ నిఫ్టీ 25,700 స్థాయికి దిగువన స్థిరపడితే 25,500 వరకు పడిపోయే ప్రమాదం ఉందని హెచ్చరిస్తున్నారు. బ్యాంక్ నిఫ్టీ కూడా దాదాపు 0.4 శాతం నష్టపోయి 58,990 వద్ద ముగిసింది. ఇది ప్రస్తుత ర్యాలీకి తాత్కాలిక విరామమే తప్ప ట్రెండ్ మార్పు కాదని విశ్లేషకులు భావిస్తున్నారు.

సెన్సెక్స్ స్టాక్స్‌లో టాటా స్టీల్, సన్ ఫార్మా, ఐటీసీ షేర్లు లాభపడగా, ఎటర్నల్, ట్రెంట్, భారతీ ఎయిర్‌టెల్ షేర్లు నష్టపోయి సూచీని కిందకు లాగాయి. బ్రాడర్ మార్కెట్‌లోనూ బలహీన వాతావరణం కనిపించింది. నిఫ్టీ మిడ్‌క్యాప్ 100 ఇండెక్స్ 1.12 శాతం, స్మాల్‌క్యాప్ 100 ఇండెక్స్ 0.90 శాతం చొప్పున నష్టపోయాయి. రంగాలవారీగా చూస్తే, కన్జ్యూమర్ డ్యూరబుల్స్, ఐటీ, పీఎస్‌యూ బ్యాంక్ షేర్లు నష్టపోగా, మెటల్, మీడియా రంగాల షేర్లు లాభపడ్డాయి.

అందరి దృష్టి ఇప్పుడు యూఎస్ ఫెడ్ సమావేశంపైనే ఉంది. ఈ భేటీలో ఫెడ్ 25 బేసిస్ పాయింట్ల వడ్డీ రేటును తగ్గించవచ్చని మార్కెట్ వర్గాలు అంచనా వేస్తున్నాయి. అయితే, 2026లో మరిన్ని కోతలపై స్పష్టత వస్తుందా లేదా అనే విషయంపై ఉత్కంఠ నెలకొంది.