పెళ్లయిన నాలుగో రోజే సెట్స్‌లో సమంత.. బ్రేక్ తీసుకోకుండా షూటింగ్

స్టార్ హీరోయిన్ సమంత ఇటీవల దర్శకుడు రాజ్ నిడిమోరును పెళ్లి చేసుకున్న విషయం తెలిసిందే. ఈ నెల 1న వీరి వివాహం జరిగింది. అయితే, పెళ్లి తర్వాత పెద్దగా విరామం తీసుకోకుండా సమంత వెంటనే తన పనిలో నిమగ్నమయ్యారు. పెళ్లయిన నాలుగో రోజే ఆమె తన కొత్త సినిమా షూటింగ్‌లో పాల్గొన్నారు.

తాను నటిస్తున్న 'మా ఇంటి బంగారం' సినిమా చిత్రీకరణను ప్రారంభించినట్లు సమంత సోషల్ మీడియా ద్వారా వెల్లడించారు. మేకప్ రూమ్‌లో తన హెయిర్ స్టైలింగ్ చేస్తుండగా తీసిన ఫొటోను పంచుకుంటూ.. "లెట్స్ గో #MaaIntiBangaram" అని క్యాప్షన్ ఇచ్చారు. కొద్ది రోజుల క్రితం ఈ సినిమా ముహూర్తపు పూజకు సంబంధించిన ఫొటోలను కూడా ఆమె షేర్ చేశారు. ఈ కొత్త ప్రయాణానికి అందరి ఆశీస్సులు కావాలని కోరారు.

సమంత, రాజ్ నిడిమోరు గతంలో విజయవంతమైన వెబ్ సిరీస్ 'ది ఫ్యామిలీ మ్యాన్ 2'కి కలిసి పనిచేశారు. ఇటీవల ఓ క్రీడా కార్యక్రమంలో వీరిద్దరూ కలిసి కనిపించడంతో వారి మధ్య ప్రేమాయణం సాగుతోందంటూ ప్రచారం జరిగింది. ఆ ఊహాగానాలకు తెరదించుతూ వీరిద్దరూ పెళ్లి బంధంతో ఒక్కటయ్యారు.

గతంలో ఓ ఇంటర్వ్యూలో రాజ్ నిడిమోరు.. సమంత గురించి మాట్లాడుతూ ఆమె పని పట్ల చూపే అంకితభావాన్ని ప్రశంసించారు. సమంతను ఆయన సరదాగా "ప్రాపర్ నెర్డ్" అని, పుస్తకాల పురుగు అని వర్ణించారు. సమంత గతంలో నటుడు నాగ చైతన్యను వివాహం చేసుకుని, 2021లో విడిపోయిన సంగతి తెలిసిందే.