అఖండ-2 ప్రీమియర్ షోలు రద్దు... కారణం ఏంటంటే?

నందమూరి బాలకృష్ణ, బోయపాటి శ్రీను కాంబినేషన్‌లో వస్తున్న పాన్ ఇండియా చిత్రం ‘అఖండ-2: తాండవం’కు ఆరంభంలోనే చిన్న అవాంతరం ఎదురైంది. ఈ రోజు (డిసెంబర్ 4) భారత్‌లో జరగాల్సిన స్పెషల్ ప్రీమియర్ షోలను రద్దు చేస్తున్నట్లు చిత్ర నిర్మాణ సంస్థ 14 రీల్స్ ప్లస్ ప్రకటించింది. సాంకేతిక సమస్యల కారణంగా ఈ నిర్ణయం తీసుకున్నట్లు వెల్లడించింది.

ఈ మేరకు 14 రీల్స్ ప్లస్ సోషల్ మీడియా వేదికగా ఒక ప్రకటన విడుదల చేసింది. "సాంకేతిక కారణాల వల్ల ఇండియాలో ఈ రోజు జరగాల్సిన ప్రీమియర్ షోలను రద్దు చేస్తున్నాము. మా వంతు మేం ఎంతగానో ప్రయత్నించాం, కానీ కొన్ని అంశాలు మా నియంత్రణలో ఉండవు. అసౌకర్యానికి క్షమించండి" అని పోస్టులో పేర్కొంది. అయితే, ఓవర్సీస్‌లో మాత్రం ప్రీమియర్ షోలు యథావిధిగా షెడ్యూల్ ప్రకారమే ప్రదర్శితమవుతాయని స్పష్టం చేసింది.

బ్లాక్‌బస్టర్ హిట్ అయిన 'అఖండ' చిత్రానికి సీక్వెల్‌గా 'అఖండ-2' వస్తుండటంతో సినిమాపై భారీ అంచనాలు నెలకొని ఉన్నాయి. ప్రీమియర్ షోల కోసం ఎంతో ఆసక్తిగా ఎదురుచూస్తున్న అభిమానులు ఈ రద్దుతో కాస్త నిరాశకు గురయ్యారు. అయితే, ముందుగా ప్రకటించినట్లుగానే డిసెంబర్ 5 నుంచి ఈ చిత్రం థియేటర్లలోకి రానుంది. ఈ ప్రీమియర్ల రద్దు సాధారణ ప్రదర్శనలపై ఎలాంటి ప్రభావం చూపబోదని తెలుస్తోంది.