‘పెద్ది’ నుంచి అప్‌డేట్.. చరణ్, జాన్వీలతో స్పెషల్ సాంగ్‌కు ప్లాన్!

మెగా పవర్ స్టార్ రామ్ చరణ్ హీరోగా, ఉప్పెన ఫేమ్ బుచ్చిబాబు దర్శకత్వంలో రూపొందుతున్న పాన్ ఇండియా చిత్రం ‘పెద్ది’ షూటింగ్ శరవేగంగా జరుగుతోంది. ఈ సినిమాకు సంబంధించి ఓ ఆసక్తికర అప్‌డేట్ బయటకు వచ్చింది. త్వరలో ప్రారంభం కానున్న షెడ్యూల్‌లో రామ్ చరణ్, హీరోయిన్ జాన్వీ కపూర్‌లపై ఓ కీలక పాటను చిత్రీకరించేందుకు చిత్ర యూనిట్ సన్నాహాలు చేస్తోంది. దీని కోసం రామోజీ ఫిల్మ్ సిటీలో ప్రత్యేకంగా ఓ భారీ సెట్‌ను నిర్మిస్తున్నట్లు సమాచారం.
 
ఈ పాటలో రామ్ చరణ్ డ్యాన్స్ స్టెప్స్, జాన్వీ కపూర్ గ్లామర్ ప్రధాన ఆకర్షణగా నిలుస్తాయని చిత్ర వర్గాలు చెబుతున్నాయి. రామ్ చరణ్ కెరీర్‌లోనే ఇది ఒక విభిన్నమైన చిత్రంగా నిలుస్తుందని, బుచ్చిబాబు రాసిన కథలో బలమైన ఎమోషన్‌తో పాటు యాక్షన్ కూడా ప్రత్యేకంగా ఉంటుందని తెలుస్తోంది.
 
ఈ ప్రతిష్ఠాత్మక చిత్రంలో కన్నడ స్టార్ శివ రాజ్‌కుమార్, జగపతి బాబు, దివ్యేంద్ర శర్మ వంటి ప్రముఖ నటులు కీలక పాత్రలు పోషిస్తున్నారు. ఆస్కార్ విజేత ఏఆర్ రెహమాన్ ఈ సినిమాకు సంగీతం అందిస్తుండటం అంచనాలను మరింత పెంచుతోంది. అన్ని కార్యక్రమాలు పూర్తి చేసి, ఈ చిత్రాన్ని వచ్చే ఏడాది మార్చి 27న ప్రపంచవ్యాప్తంగా విడుదల చేసేందుకు నిర్మాతలు ప్లాన్ చేస్తున్నారు.