: పెళ్లిపై ధోనీ ఫన్నీ కామెంట్స్.. భర్తలందరిదీ ఒకటే కథన్న మహీ!

టీమిండియా మాజీ కెప్టెన్ మహేంద్ర సింగ్ ధోనీ తనదైన మాటతీరు, హాస్యచతురతతో ఎప్పుడూ అభిమానులను ఆకట్టుకుంటాడు. తాజాగా ఓ పెళ్లి వేడుకలో ఆయన చేసిన సరదా వ్యాఖ్యలకు సంబంధించిన వీడియో ఒకటి సోషల్ మీడియాలో వైరల్ అవుతోంది. ఈ వీడియోలో నూతన వధూవరుల పక్కన నిల్చున్న ధోనీ, పెళ్లి జీవితంపై వారికి సరదాగా కొన్ని సలహాలు ఇచ్చాడు.

వరుడిని ఉద్దేశిస్తూ, "పెళ్లి చేసుకోవడం చాలా మంచి విషయం. కానీ, నువ్వు చాలా తొందరపడ్డావు. కొంతమందికి నిప్పుతో చెలగాటం ఆడటం ఇష్టం. ఉత్కర్ష్ (వరుడు) కూడా అలాంటి వాడే" అని ధోనీ అనడంతో అక్కడున్న వారంతా నవ్వేశారు. అనంతరం భర్తలందరినీ ఉద్దేశించి, "నా భార్య వేరు అని మాత్రం అస్సలు అనుకోవద్దు. ఇక్కడున్న భర్తలందరి పరిస్థితి ఒకటే. మనం వరల్డ్ కప్ గెలిచామా? లేదా? అన్నదానితో సంబంధం లేదు" అంటూ చమత్కరించాడు.

ఇక వధువుకు సలహా ఇస్తూ, "భర్తకు కోపం వస్తే ఏమీ మాట్లాడకండి. ఐదు నిమిషాల్లో వాళ్లే చల్లబడతారు. మా బలం మాకు తెలుసు" అని చెప్పి నూతన దంపతులను ఆశీర్వదించాడు. ఈ వీడియో పాతదా? లేక కొత్తదా? అనే దానిపై స్పష్టత లేదు. కానీ, ప్ర‌స్తుతం సోష‌ల్ మీడియాలో వైర‌ల్ అవుతోంది. దీనిపై నెటిజ‌న్లు త‌మ‌దైన‌శైలిలో స్పందిస్తున్నారు.

ఇదిలా ఉంటే.. దక్షిణాఫ్రికాతో వన్డే సిరీస్ కోసం విరాట్ కోహ్లీ భారత్‌కు తిరిగి వచ్చాడు. వచ్చిన వెంటనే ధోనీ నివాసానికి వెళ్లి కలిశాడు. ఈ డిన్నర్ విందులో రిషభ్‌ పంత్ కూడా పాల్గొన్నట్లు సమాచారం. డిన్నర్ తర్వాత ధోనీ స్వయంగా కోహ్లీని కారులో డ్రైవ్‌కు తీసుకెళ్లిన వీడియోలు కూడా వైరల్ అయ్యాయి. వీరి కలయికను స్టార్ స్పోర్ట్స్ "రీయూనియన్ ఆఫ్ ది ఇయర్"గా అభివర్ణించింది.