'ఐబొమ్మ' క్లౌడ్‌లో 21 వేల సినిమాలు.. విచారణలో విస్తుపోయే నిజాలు!

తెలుగు రాష్ట్రాల్లో సంచలనం సృష్టించిన పైరసీ వెబ్‌సైట్ 'ఐబొమ్మ' కేసులో విచారణ వేగవంతమైంది. ఈ కేసులో ప్రధాన నిందితుడైన నిర్వాహకుడు ఇమంది రవిని హైదరాబాద్ సైబర్‌క్రైమ్ పోలీసులు మరోసారి కస్టడీలోకి తీసుకున్నారు. చంచల్‌గూడ జైలులో ఉన్న అతడిని గురువారం బషీర్‌బాగ్‌లోని సీసీఎస్ కార్యాలయానికి తరలించి విచారణ చేపట్టారు. ఈ విచారణలో విస్తుపోయే వాస్తవాలు వెలుగులోకి వస్తున్నాయి.

విచారణ సందర్భంగా ఐబొమ్మ వెబ్‌సైట్ కోసం డేటాను ఎలా నిర్వహించాడు, పైరసీకి అనుసరించిన పద్ధతులపై అధికారులు లోతుగా ప్రశ్నించినట్లు స‌మాచారం. ఈ క్రమంలో నిందితుడి యూజర్ ఐడీ, పాస్‌వర్డ్‌తో క్లౌడ్ సర్వర్‌ను తెరిచి చూడగా, అందులో ఏకంగా 21 వేల పైరసీ సినిమాలు భద్రపరిచి ఉన్నట్లు గుర్తించి అధికారులు నివ్వెరపోయారు. 

అలాగే రవి ఈ-మెయిల్‌ను పరిశీలించగా, ఐబొమ్మ వెబ్‌సైట్‌కు సంబంధించిన డొమైన్లను కొనుగోలు చేసిన బిల్లులను పోలీసులు స్వాధీనం చేసుకున్నారు. ఈ ఆధారాలు కేసులో కీలకం కానున్నాయి. నిందితుడిని మరో రెండు రోజుల పాటు విచారించాల్సి ఉందని, ఈ విచారణలో మరిన్ని విషయాలు బయటపడే అవకాశం ఉందని అధికారులు తెలిపారు.