నెల్లూరు లేడీ డాన్ అరుణ రిమాండ్ పొడిగింపు

నెల్లూరుకు చెందిన 'లేడీ డాన్'గా ప్రచారంలో ఉన్న అరుణకు విజయవాడ కోర్టులో మరోసారి చుక్కెదురైంది. ఆమె రిమాండ్‌ను ఈ నెల 28వ తేదీ వరకు పొడిగిస్తూ న్యాయస్థానం నిన్న ఆదేశాలు జారీ చేసింది. విజయవాడలోని సూర్యారావుపేట పోలీస్ స్టేషన్‌లో అరుణపై చీటింగ్, బెదిరింపులకు పాల్పడినట్లుగా కేసు నమోదైన విషయం తెలిసిందే. ఈ కేసుకు సంబంధించి పోలీసులు ఆమెను రెండు రోజుల పాటు తమ కస్టడీలో విచారించారు. విచారణ పూర్తయిన అనంతరం ఆమెను కోర్టులో హాజరుపరిచారు.
 
కేసును విచారించిన న్యాయమూర్తి, ఆమె రిమాండ్‌ను మరో రెండు వారాల పాటు పొడిగిస్తూ ఉత్తర్వులు జారీ చేశారు. దీంతో పోలీసులు ఆమెను తిరిగి జైలుకు తరలించారు. చీటింగ్, బెదిరింపుల ఆరోపణలతో ఆమె అరెస్ట్ కావడం అప్పట్లో తీవ్ర చర్చనీయాంశంగా మారింది.