జూబ్లీహిల్స్‌లో విజయం దిశగా కాంగ్రెస్‌.. గాంధీభవన్‌లో సంబరాలు.. డ్యాన్స్ చేసిన వీహెచ్

జూబ్లీహిల్స్ అసెంబ్లీ నియోజకవర్గ ఉప ఎన్నిక ఓట్ల లెక్కింపులో కాంగ్రెస్ పార్టీ స్పష్టమైన ఆధిక్యంతో విజయం దిశగా దూసుకెళ్తోంది. ఆ పార్టీ అభ్యర్థి నవీన్ యాదవ్ ప్రతి రౌండ్‌లోనూ తన సమీప ప్రత్యర్థిపై ఆధిక్యాన్ని పెంచుకుంటూ గెలుపును ఖాయం చేసుకుంటున్నారు. లెక్కింపు ప్రారంభమైనప్పటి నుంచి ఇప్పటివరకు ఒక్క రౌండ్‌లో కూడా భారత రాష్ట్ర సమితి (బీఆర్ఎస్) అభ్యర్థి మాగంటి సునీత ముందంజ వేయలేకపోయారు.

ఓట్ల లెక్కింపు సరళిని బట్టి కాంగ్రెస్ విజయం తథ్యమని తేలిపోవడంతో, పార్టీ రాష్ట్ర కార్యాలయం గాంధీభవన్‌లో అప్పుడే సంబరాలు మొదలయ్యాయి. పెద్ద సంఖ్యలో పార్టీ నేతలు, కార్యకర్తలు అక్కడికి చేరుకుని సందడి చేస్తున్నారు. బాణసంచా కాలుస్తూ, ఒకరికొకరు మిఠాయిలు పంచుకుంటూ తమ ఆనందాన్ని వ్యక్తం చేస్తున్నారు. సీనియర్ నేత వి.హనుమంతరావు డ్యాన్స్ చేస్తూ సంబరాలు జరుపుకున్నారు.

ఈ సందర్భంగా కాంగ్రెస్ కార్యకర్తలు సోనియా గాంధీ, రాహుల్ గాంధీ, ముఖ్యమంత్రి రేవంత్ రెడ్డికి అనుకూలంగా పెద్ద ఎత్తున నినాదాలు చేశారు. జూబ్లీహిల్స్‌లో పార్టీ గెలుపు ఖాయమనే ధీమా వారిలో కనిపిస్తోంది. రౌండ్ రౌండ్‌కూ నవీన్ యాదవ్ ఆధిక్యం అంతకంతకూ పెరుగుతుండటంతో, తుది ఫలితం వెలువడకముందే గాంధీభవన్ వద్ద పండుగ వాతావరణం నెలకొంది.