హాంగ్‌కాంగ్ సిక్సెస్‌లో భారత్‌కు వరుసగా రెండో ఓటమి.. మ‌నోళ్ల‌ను చిత్తు చేసిన‌ కువైట్‌, యూఏఈ

హాంగ్‌కాంగ్ సిక్సెస్ 2025 టోర్నమెంట్‌లో భారత జట్టు పేలవ ప్రదర్శన కొనసాగుతోంది. శనివారం జరిగిన మ్యాచ్‌లో యునైటెడ్ అరబ్ ఎమిరేట్స్ (యూఏఈ) చేతిలో భారత్ 4 వికెట్ల తేడాతో ఓటమిపాలైంది. ఉత్కంఠభరితంగా సాగిన ఈ మ్యాచ్‌లో చివరి ఓవర్లో యూఏఈ విజయాన్ని అందుకుంది. ఈ టోర్నీలో భారత జట్టుకు ఇది వరుసగా రెండో పరాజయం.

భారత్ నిర్దేశించిన 108 పరుగుల లక్ష్య ఛేదనలో యూఏఈకి అద్భుతమైన ఆరంభం లభించింది. ఓపెనర్లు ఖలీద్ షా, సఘీర్ ఖాన్ తొలి రెండు ఓవర్లలోనే 42 పరుగులు జోడించి జట్టు విజయానికి బలమైన పునాది వేశారు. ఆ తర్వాత భారత బౌలర్లు పుంజుకున్నప్పటికీ, చివర్లో మహమ్మద్ అర్ఫాన్ చెలరేగాడు. మ్యాచ్ ముగియడానికి ఒక బంతి మిగిలి ఉండగా భారీ సిక్సర్ కొట్టి యూఏఈకి చిరస్మరణీయ విజయాన్ని అందించాడు. భారత బౌలర్లలో స్టువర్ట్ బిన్నీ, భరత్ చిప్లీ తలో రెండు వికెట్లు తీశారు.

అంతకుముందు బ్యాటింగ్ చేసిన భారత్, నిర్ణీత ఓవర్లలో 3 వికెట్ల నష్టానికి 107 పరుగులు చేసింది. అభిమన్యు మిథున్ 50 పరుగుల‌తో అద్భుతంగా రాణించగా, దినేశ్ కార్తీక్ 42 ర‌న్స్‌తో అతనికి చక్కటి సహకారం అందించాడు. వీరిద్దరి మెరుపులతో భారత్ పోరాడగలిగే స్కోరు సాధించినా, బౌలర్లు దానిని కాపాడటంలో విఫలమయ్యారు.

ఈ టోర్నీలో కువైట్ చేతిలో 27 పరుగుల తేడాతో ఓడిపోయిన భారత్, ఇప్పుడు యూఏఈ చేతిలోనూ ఓడిపోవడంతో అభిమానులు నిరాశ చెందారు.