మైండ్ గేమ్‌లో నెగ్గిన వరుణ్.. మ్యాచ్‌లో గెలిచిన ఆసీస్

భారత్, ఆస్ట్రేలియా జట్ల మధ్య మెల్‌బోర్న్ వేదికగా జరిగిన రెండో టీ20 మ్యాచ్‌లో ఓ ఆసక్తికరమైన సంఘటన చోటుచేసుకుంది. భారత స్పిన్నర్ వరుణ్ చక్రవర్తి, ఆస్ట్రేలియా ఆల్‌రౌండర్ టిమ్ డేవిడ్ మధ్య నడిచిన సరదా మైండ్ గేమ్‌లో చివరికి వరుణ్ దే పైచేయి అయింది.

ఆస్ట్రేలియా ఛేదనలో 9వ ఓవర్ వేయడానికి వరుణ్ చక్రవర్తి సిద్ధమయ్యాడు. రెండో బంతిని వేసేందుకు రనప్ పూర్తిచేసే సమయంలో బ్యాటర్ టిమ్ డేవిడ్ క్రీజు నుంచి పక్కకు తప్పుకున్నాడు. దీనికి ప్రతిగా వరుణ్ కూడా తన రనప్‌ను పూర్తి చేసి బంతి వేయకుండా వెనక్కి వెళ్లిపోయాడు. 

ఈ ఘటన చూసి భారత కెప్టెన్ సూర్యకుమార్ యాదవ్ నవ్వు ఆపుకోలేకపోయాడు. సరిగ్గా రెండు బంతుల తర్వాత, వరుణ్ చక్రవర్తి అదే టిమ్ డేవిడ్‌ను తన బౌలింగ్‌లోనే క్యాచ్ పట్టి పెవిలియన్‌కు పంపడం విశేషం. ఈ మ్యాచ్‌లో వరుణ్ నాలుగు ఓవర్లలో 23 పరుగులిచ్చి 2 వికెట్లు పడగొట్టాడు.

ఇక, మ్యాచ్ విషయానికొస్తే టీమిండియాపై ఆస్ట్రేలియా 4 వికెట్ల తేడాతో ఘన విజయం సాధించింది. తొలుత బౌలింగ్‌లో జాష్ హేజిల్‌వుడ్ (3/13) తన అద్భుతమైన స్పెల్‌తో భారత బ్యాటింగ్‌ను కట్టడి చేశాడు. దీంతో టాస్ ఓడి బ్యాటింగ్‌కు దిగిన భారత్ 18.4 ఓవర్లలో 125 పరుగులకే ఆలౌట్ అయింది. భారత జట్టులో యువ ఓపెనర్ అభిషేక్ శర్మ (37 బంతుల్లో 68; 8 ఫోర్లు, 2 సిక్సులు) ఒంటరి పోరాటం చేశాడు. జట్టు స్కోరులో సగానికి పైగా పరుగులు అతడే చేయడం గమనార్హం.

అనంతరం 126 పరుగుల లక్ష్యంతో బరిలోకి దిగిన ఆస్ట్రేలియా, మిచెల్ మార్ష్ (26 బంతుల్లో 46) మెరుపు ఇన్నింగ్స్‌తో సునాయాసంగా విజయం దిశగా సాగింది. ఆసీస్ 13.2 ఓవర్లలోనే 6 వికెట్లు కోల్పోయి లక్ష్యాన్ని ఛేదించింది. చివరిలో జస్‌ప్రీత్ బుమ్రా వరుస బంతుల్లో రెండు వికెట్లు తీసినా, అప్పటికే ఆలస్యమైంది.

ఐదు మ్యాచ్‌ల ఈ సిరీస్‌లో కాన్‌బెర్రాలో జరగాల్సిన తొలి మ్యాచ్ వర్షం కారణంగా రద్దయింది. మెల్‌బోర్న్‌లో జరిగిన ఈ రెండో మ్యాచ్‌కు 82,400 మందికి పైగా ప్రేక్షకులు హాజరయ్యారు. సిరీస్‌లో తదుపరి మ్యాచ్ ఆదివారం హోబార్ట్‌లో జరగనుంది.