తుపానుగా మారిన వాయుగుండం.. అప్రమత్తమైన ఏపీ సర్కార్

బంగాళాఖాతంలో ఏర్పడిన వాయుగుండం మరింత బలపడి 'మిథాయ్' తుపానుగా మారింది. ఇది రేపు తీవ్ర తుపానుగా మారి మచిలీపట్నం-కళింగపట్నం మధ్య కాకినాడ సమీపంలో తీరం దాటే అవకాశం ఉందని భారత వాతావరణ శాఖ (ఐఎండీ) వెల్లడించింది. తుపాను తీరం దాటే సమయంలో గంటకు 90 నుంచి 110 కిలోమీటర్ల వేగంతో పెనుగాలులు వీచే ప్రమాదం ఉందని అధికారులు హెచ్చరించారు.

వాతావరణ శాఖ వివరాల ప్రకారం.. ఈ తుపాను ప్రస్తుతం విశాఖపట్నానికి దక్షిణ ఆగ్నేయంగా 710 కి.మీ, కాకినాడకు ఆగ్నేయంగా 680 కి.మీ. దూరంలో కేంద్రీకృతమై ఉంది. పశ్చిమ వాయవ్య దిశగా గంటకు 16 కిలోమీటర్ల వేగంతో కదులుతున్న ఈ తుపాను, మంగళవారం ఉదయానికి తీవ్ర తుపానుగా మారే అవకాశం ఉంది. దీని ప్రభావంతో తీరం వెంబడి గంటకు 50 నుంచి 70 కిలోమీటర్ల వేగంతో ఈదురుగాలులు వీస్తాయని అధికారులు తెలిపారు.

ప్రభుత్వం ముందస్తు చర్యలు

మిథాయ్ తుపాను హెచ్చరికల నేపథ్యంలో రాష్ట్ర ప్రభుత్వం పూర్తిస్థాయిలో అప్రమత్తమైంది. తక్షణ సహాయక చర్యల కోసం రూ.19 కోట్లు విడుదల చేసింది. సంబంధిత అధికారులందరి సెలవులను రద్దు చేసి, విధులకు హాజరు కావాలని ఆదేశించింది. తీర ప్రాంతాల్లోని 57 మండలాల్లో 219 తుపాను పునరావాస కేంద్రాలను (షెల్టర్లు) సిద్ధం చేశారు. సముద్రంలో వేటకు వెళ్లిన 62 మెకనైజ్డ్ బోట్లను వెనక్కి రప్పించే పనులు చేపట్టారు. తీర ప్రాంతాల్లో పర్యాటకుల రాకపోకలను పూర్తిగా నిషేధించారు.

సహాయక బృందాలు, పాఠశాలలకు సెలవులు

ఎలాంటి విపత్తునైనా ఎదుర్కొనేందుకు ప్రభుత్వం సహాయక బృందాలను సిద్ధంగా ఉంచింది. 9 ఎస్డీఆర్‌ఎఫ్‌, 7 ఎన్డీఆర్‌ఎఫ్‌ బృందాలను ప్రభావిత ప్రాంతాలకు తరలించారు. జిల్లాల్లో తాగునీరు, ఆహారం, సహాయ శిబిరాల ఏర్పాటు కోసం టీఆర్‌-27 కింద నిధులు మంజూరు చేశారు. ముందుజాగ్రత్త చర్యగా అనకాపల్లి, కృష్ణా, ఎన్టీఆర్‌, గుంటూరు జిల్లాల్లో విద్యాసంస్థలకు ఎల్లుండి వరకు సెలవులు ప్రకటించారు. పశ్చిమ గోదావరి, ఏలూరు, బాపట్ల, కడప జిల్లాల్లో రేపటి వరకు, నెల్లూరు జిల్లాలో నేడు సెలవు ఇస్తున్నట్లు ఆయా జిల్లాల కలెక్టర్లు ఉత్తర్వులు జారీ చేశారు.