డీసీపీ చైతన్యపై కత్తితో దాడి చేసిన క్రిమినల్ ఇతడే!

హైదరాబాద్ సౌత్ ఈస్ట్ జోన్ డీసీపీ చైతన్య కుమార్‌పై కత్తితో దాడి చేసిన దొంగను పాత నేరస్తుడు ఒమర్ అన్సారీగా గుర్తించారు. దొంగతనాన్ని అడ్డుకోబోయిన డీసీపీపైనే అతడు దాడికి తెగబడటంతో, అధికారి ఆత్మరక్షణ కోసం కాల్పులు జరిపారు. ఈ ఘటనలో తీవ్రంగా గాయపడిన నిందితుడి పరిస్థితి విషమంగా ఉంది. నగరంలో శాంతిభద్రతల పరిస్థితికి ఈ ఘటన అద్దం పడుతోంది.

వివరాల్లోకి వెళ్తే, చాదర్‌ఘాట్ విక్టోరియా గ్రౌండ్ వద్ద ఆటోలో ప్రయాణిస్తున్న వారి నుంచి ఇద్దరు దొంగలు సెల్ ఫోన్లు లాక్కోవడానికి ప్రయత్నించారు. అదే సమయంలో అటుగా వెళ్తున్న డీసీపీ చైతన్య కుమార్ ఇది గమనించి, వెంటనే తన గన్‌మెన్‌ను వారి వద్దకు పంపారు. అయితే, దొంగల్లో ఒకడైన ఒమర్ అన్సారీ గన్‌మెన్‌పై కత్తితో దాడికి యత్నించాడు.

వెంటనే స్పందించిన డీసీపీ చైతన్య కుమార్ అడ్డుకోగా, నిందితుడు ఆయన్ను పక్కకు తోసేసి, ఆయనపై కూడా కత్తితో దాడి చేసేందుకు ముందుకొచ్చాడు. ఈ అనూహ్య పరిణామంతో అప్రమత్తమైన డీసీపీ, తన సర్వీస్ రివాల్వర్‌తో ఒమర్‌పై రెండు రౌండ్లు కాల్పులు జరిపారు. ఈ కాల్పుల్లో ఒక బుల్లెట్ చేతికి, మరొకటి కడుపులోకి దూసుకెళ్లడంతో అతడు అక్కడికక్కడే కుప్పకూలిపోయాడు. వెంటనే అతడిని ఆసుపత్రికి తరలించగా, పరిస్థితి విషమంగా ఉన్నట్లు వైద్యులు తెలిపారు.

పోలీసుల విచారణలో నిందితుడు ఒమర్ అన్సారీ ఒక పాత నేరస్థుడని తేలింది. అతనిపై ఇప్పటికే నగరంలోని వివిధ పోలీస్ స్టేషన్లలో 20కి పైగా కేసులు నమోదయ్యాయి. గతంలో రెండుసార్లు పీడీ యాక్ట్ కూడా ప్రయోగించారు. ఉన్నతాధికారిపైనే దాడికి తెగబడటం నగరంలో కలకలం రేపింది.