భారత్ ఇక రష్యా నుంచి పెద్దగా ఆయిల్ కొనదు.. మోదీతో మాట్లాడానన్న ట్రంప్

రష్యా నుంచి చమురు కొనుగోలు విషయంలో భారత్ కీలక నిర్ణయం తీసుకుందని అమెరికా అధ్యక్షుడు డొనాల్డ్ ట్రంప్ సంచలన వ్యాఖ్యలు చేశారు. భారత్ ఇకపై రష్యా నుంచి పెద్ద ఎత్తున ఆయిల్ కొనుగోలు చేయబోదని పేర్కొన్నారు. వైట్‌హౌస్‌లో దీపావళి వేడుకల సందర్భంగా భారత ప్రధాని నరేంద్ర మోదీతో తాను ఫోన్‌లో మాట్లాడానని, ఈ సంభాషణ ఆధారంగానే ఈ విషయం చెబుతున్నానని స్పష్టం చేశారు.

"ఈ రోజు నేను ప్రధాని మోదీతో మాట్లాడాను. మా మధ్య మంచి సంబంధాలు ఉన్నాయి. వారు రష్యా నుంచి పెద్దగా ఆయిల్ కొనబోరు. రష్యా-ఉక్రెయిన్ మధ్య యుద్ధం ముగియాలని నేను ఎంతగా కోరుకుంటున్నానో, ఆయన కూడా అంతే కోరుకుంటున్నారు. వారు ఇప్పటికే దిగుమతులను బాగా తగ్గించారు, భవిష్యత్తులోనూ తగ్గింపును కొనసాగిస్తారు" అని ట్రంప్ వివరించారు.

అయితే, ట్రంప్ తాజా వ్యాఖ్యలపై భారత ప్రభుత్వం ఇప్పటివరకు అధికారికంగా స్పందించలేదు. ట్రంప్‌ ఫోన్ కాల్ చేసినందుకు బుధవారం ప్రధాని మోదీ ధన్యవాదాలు తెలుపుతూ దీపావళి శుభాకాంక్షలు తెలియజేశారు. గతంలో ట్రంప్ ఇలాంటి వ్యాఖ్యలు చేసినప్పుడు మాత్రం న్యూఢిల్లీ వాటిని తోసిపుచ్చింది. "భారత్ పెద్ద మొత్తంలో చమురు, గ్యాస్ దిగుమతి చేసుకుంటుంది. అస్థిర ఇంధన మార్కెట్‌లో భారతీయ వినియోగదారుల ప్రయోజనాలను కాపాడటమే మా ప్రథమ ప్రాధాన్యం. మా దిగుమతి విధానాలు పూర్తిగా ఈ లక్ష్యంపైనే ఆధారపడి ఉంటాయి" అని గతంలో భారత్ స్పష్టం చేసింది.

ఇదే సమయంలో చైనాతో వాణిజ్య సంబంధాలపైనా ట్రంప్ మాట్లాడారు. "నవంబర్ 1వ తేదీ నుంచి చైనా దిగుమతులపై సుమారు 155 శాతం సుంకాలు విధిస్తాం. ఇది వారికి ఏమాత్రం నిలకడైనది కాదని నేను భావిస్తున్నాను. గతంలో వ్యాపారపరంగా తెలివైన అధ్యక్షులు లేకపోవడం వల్లే చైనా, ఇతర దేశాలు మమ్మల్ని చాలా ఇబ్బంది పెట్టాయి" అని ఆయన అన్నారు. యూరోపియన్ యూనియన్, జపాన్, దక్షిణ కొరియాతో తాను చేసుకున్న ఒప్పందాలు గొప్పవని, టారిఫ్‌ల ద్వారానే ఇది సాధ్యమైందని ట్రంప్ తెలిపారు. ఈ సుంకాల ద్వారా వస్తున్న వందల బిలియన్ల డాలర్లతో దేశ అప్పులు తీరుస్తామని ఆయన పేర్కొన్నారు.