డాక్టర్ కృతిక రెడ్డి హత్య కేసులో ట్విస్ట్... అనస్థీషియా తాను ఇవ్వలేదంటున్న భర్త!

కర్ణాటక రాజధాని బెంగళూరులో సంచలనం సృష్టించిన మహిళా డెర్మటాలజిస్ట్ డాక్టర్ కృతిక మహేంద్ర రెడ్డి (28) హత్య కేసు అనూహ్య మలుపు తిరిగింది. ఈ కేసులో ప్రధాన నిందితుడిగా ఆరోపణలు ఎదుర్కొంటున్న ఆమె భర్త, డాక్టర్ మహేంద్ర రెడ్డి (31), పోలీసుల విచారణలో కీలక వ్యాఖ్యలు చేశాడు. "నేను ఆమెకు అనస్థీషియా (మత్తు) ఇవ్వలేదు" అంటూ తనపై వచ్చిన ఆరోపణలను ఖండించాడు. ఇదే సమయంలో, ఈ హత్య వెనుక మరో మహిళ ప్రమేయం ఉందన్న కోణంలో పోలీసులు దర్యాప్తును వేగవంతం చేశారు.

వివాహమైన రెండు నెలలకే, ఏప్రిల్ 24న కృతిక గుంజూరులోని తమ నివాసంలో అనుమానాస్పద స్థితిలో మృతి చెందింది. ఉదర సంబంధిత సమస్యల వల్లే ఆమె మరణించిందని తొలుత భావించినా, కృతిక తల్లిదండ్రులు అల్లుడు మహేంద్ర రెడ్డిపై అనుమానాలు వ్యక్తం చేయడంతో కేసు దర్యాప్తు దిశ మారింది. ఫోరెన్సిక్ సైన్స్ ల్యాబ్ (FSL) నివేదికలో ఆమె శరీరంలో ప్రొపోఫాల్ (అనస్థీషియా కోసం వాడే మందు) అధిక మోతాదులో ఉన్నట్లు తేలడంతో, ఇది సహజ మరణం కాదని, హత్యేనని పోలీసులు నిర్ధారణకు వచ్చారు.

దీంతో పోలీసులు మణిపాల్‌లో ఉన్న మహేంద్ర రెడ్డిని అరెస్టు చేసి బెంగళూరుకు తరలించారు. ప్రస్తుతం అతడిని తొమ్మిది రోజుల పోలీస్ కస్టడీకి తీసుకుని విచారిస్తున్నారు. విచారణలో భాగంగా, మహేంద్ర రెడ్డి ఆరోపణలను ఖండిస్తున్నాడని, అయితే ఇతర వివరాలు చెప్పకుండా మౌనంగా ఉంటున్నాడని ఒక సీనియర్ పోలీస్ అధికారి తెలిపారు. కడుపునొప్పి లాంటి చిన్న సమస్యకు అనస్థీషియా ఇవ్వాల్సిన అవసరం లేదని, అసలు నిజాన్ని నిందితుడు దాచిపెడుతున్నాడని పోలీసులు అనుమానిస్తున్నారు.

ఈ కేసులో భాగంగా, పోలీసులు వారి నివాసంలో తనిఖీలు నిర్వహించి ల్యాప్‌టాప్‌లు, మొబైల్ ఫోన్లు వంటి ఎలక్ట్రానిక్ పరికరాలను స్వాధీనం చేసుకున్నారు. వాటి నుంచి డేటాను రికవరీ చేసేందుకు ఫోరెన్సిక్ ల్యాబ్‌కు పంపారు. మహేంద్ర రెడ్డికి మరో మహిళతో సంబంధాలు ఉన్నాయనే ప్రచారం జరుగుతుండటంతో, ఆ కోణంలో కూడా పోలీసులు లోతుగా దర్యాప్తు చేస్తున్నారు. హత్యకు అసలు కారణం ఏమిటి? ప్రొపోఫాల్ డ్రగ్‌ను మహేంద్ర ఎలా సంపాదించాడు? ఈ కేసులో మరో మహిళ పాత్ర ఎంతవరకు ఉంది? అనే కీలక అంశాలపై పోలీసులు దృష్టి సారించారు.