అవి వెల్డింగ్ గ్లాసులా?.. పాక్ స్పిన్నర్ పరువు తీసేసిన రమీజ్ రాజా!

పాకిస్థాన్ మాజీ కెప్టెన్, ప్రముఖ కామెంటేటర్ రమీజ్ రాజా తన వ్యాఖ్యానంతో మరోసారి వివాదంలో చిక్కుకున్నాడు. దక్షిణాఫ్రికాతో జరుగుతున్న టెస్టు మ్యాచ్‌లో సొంత జట్టు ఆటగాడిపైనే ఆయన చేసిన వ్యాఖ్యలు ఇప్పుడు సోషల్ మీడియాలో తీవ్ర చర్చనీయాంశంగా మారాయి. పాక్ స్పిన్నర్ నోమన్ అలీ ధరించిన కళ్లద్దాలను ఉద్దేశించి రమీజ్ వేసిన సెటైర్, కొందరికి నవ్వు తెప్పించినా మరికొందరి నుంచి తీవ్ర విమర్శలకు దారితీసింది.

లాహోర్ వేదికగా పాక్‌, దక్షిణాఫ్రికా మధ్య జరుగుతున్న తొలి టెస్టు రెండో రోజు ఆటలో ఈ ఘటన చోటుచేసుకుంది. దక్షిణాఫ్రికా బ్యాటర్లను తన స్పిన్‌తో ముప్పుతిప్పలు పెడుతూ నోమన్ అలీ నాలుగు వికెట్లు పడగొట్టి అద్భుతంగా రాణిస్తున్నాడు. సరిగ్గా అదే సమయంలో కామెంట్రీ బాక్స్‌లో ఉన్న రమీజ్ రాజా, "నోమన్ అలీ కళ్లద్దాలు చాలా స్టైలిష్‌గా ఉన్నాయి. చూడటానికి అచ్చం వెల్డింగ్ గ్లాసెస్‌లా కనిపిస్తున్నాయి" అని వ్యాఖ్యానించాడు. ఈ కామెంట్ ప్రత్యక్ష ప్రసారం కావడంతో వెంటనే వైరల్‌గా మారింది. కొందరు నెటిజన్లు దీన్ని తేలికగా తీసుకున్నా, ఒక జాతీయ జట్టు ఆటగాడిని ఇలా అవమానించడం సరికాదంటూ పలువురు రమీజ్‌పై ఆగ్రహం వ్యక్తం చేస్తున్నారు.

ఈ సిరీస్‌లో రమీజ్ రాజా వివాదాస్పద వ్యాఖ్యలు చేయడం ఇది తొలిసారి కాదు. ఇంతకుముందు పాక్ స్టార్ బ్యాటర్ బాబర్ ఆజమ్ విషయంలోనూ ఆయన ఇలాగే ప్రవర్తించాడు. బాబర్ ఔటైన సందర్భంలో మైక్ ఆఫ్ అయిందనుకుని, "అవుట్ అయ్యాడుగా.. ఇక డ్రామా మొదలుపెడతాడు" అంటూ లైవ్‌లోనే వ్యాఖ్యానించాడు. అయితే, రివ్యూలో బాబర్ నాటౌట్‌గా తేలడంతో రమీజ్ రాజా అప్పుడు కూడా నెట్టింట భారీగా ట్రోలింగ్‌కు గురయ్యాడు.

ఇక మ్యాచ్ విషయానికొస్తే, పాకిస్థాన్ తొలి ఇన్నింగ్స్‌లో 378 పరుగులకు ఆలౌట్ అయింది. ఇమామ్ ఉల్ హక్ (93), సల్మాన్ అలీ అఘా (93) త్రుటిలో సెంచరీలు చేజార్చుకోగా, షాన్ మసూద్ (76), మహమ్మద్ రిజ్వాన్ (75) రాణించారు. దక్షిణాఫ్రికా బౌలర్ సెనురన్ ముతుసామీ 6 వికెట్లతో పాక్‌ను దెబ్బతీశాడు. అనంతరం బ్యాటింగ్ ప్రారంభించిన దక్షిణాఫ్రికా, రెండో రోజు ఆట ముగిసే సమయానికి 6 వికెట్ల నష్టానికి 216 పరుగులు చేసింది. టోనీ డీ జోర్జీ (81 నాటౌట్‌) క్రీజులో నిలవగా, పాక్ బౌలర్లలో నోమన్ అలీ 4 వికెట్లతో సత్తా చాటాడు. దక్షిణాఫ్రికా ఇంకా 162 పరుగులు వెనుకబడి ఉంది.