కరూర్ తొక్కిసలాట ఘటనపై సుప్రీంకోర్టును ఆశ్రయించిన విజయ్ పార్టీ టీవీకే

ప్రముఖ నటుడు విజయ్ నేతృత్వంలోని తమిళగ వెట్రి కళగం (టీవీకే) పార్టీ, కరూర్ జిల్లాలో జరిగిన తొక్కిసలాట ఘటన దర్యాప్తు విషయంలో సుప్రీంకోర్టును ఆశ్రయించింది. రాష్ట్ర పోలీసు అధికారులతో ఏర్పాటు చేసిన ప్రత్యేక దర్యాప్తు బృందం (సిట్) విచారణను సవాలు చేస్తూ సర్వోన్నత న్యాయస్థానంలో పిటిషన్ దాఖలు చేసింది. ఈ ఘటనపై రిటైర్డ్ సుప్రీంకోర్టు న్యాయమూర్తితో నిష్పక్షపాత విచారణ జరిపించాలని కోరింది.

సెప్టెంబర్ 27న కరూర్‌లో జరిగిన టీవీకే బహిరంగ సభలో తొక్కిసలాట జరిగి 41 మంది మరణించిన విషయం తెలిసిందే. ఈ దుర్ఘటనపై విచారణ జరిపేందుకు ఇన్‌స్పెక్టర్ జనరల్ ఆఫ్ పోలీస్ నేతృత్వంలో సిట్‌ను ఏర్పాటు చేస్తూ మద్రాస్ హైకోర్టు ఈ నెల‌ 3న ఆదేశాలు జారీ చేసింది. అయితే, ఈ ఆదేశాలను టీవీకే తీవ్రంగా వ్యతిరేకిస్తోంది. రాష్ట్ర పోలీసుల విచారణ నిష్పక్షపాతంగా సాగదన్న అనుమానాలను తమ పిటిషన్‌లో వ్యక్తం చేసింది.

రాష్ట్ర పోలీసుల స్వతంత్రతపై హైకోర్టే స్వయంగా అసంతృప్తి వ్యక్తం చేసిందని, అయినప్పటికీ ముగ్గురు సీనియర్ పోలీస్ అధికారులతోనే సిట్‌ను ఏర్పాటు చేయడం తమను తీవ్ర ఆందోళనకు గురిచేస్తోందని టీవీకే వాదించింది. కొందరు దుండగులు సభలో అలజడి సృష్టించేందుకు పథకం ప్రకారం కుట్ర పన్ని ఉండొచ్చనే కోణాన్ని తోసిపుచ్చలేమని, కాబట్టి స్వతంత్ర దర్యాప్తు సంస్థతో విచారణ జరిపితేనే వాస్తవాలు వెలుగులోకి వస్తాయని పిటిషన్‌లో పేర్కొంది.

తమ వాదనలు వినకుండా, ఎలాంటి వాస్తవ విచారణ జరపకుండానే హైకోర్టు తమ పార్టీకి వ్యతిరేకంగా కొన్ని కఠినమైన వ్యాఖ్యలు చేసిందని టీవీకే ఆరోపించింది. ఇది సహజ న్యాయ సూత్రాలకు, నిష్పక్షపాత విచారణకు పూర్తి విరుద్ధమని స్పష్టం చేసింది. ఈ నేపథ్యంలో హైకోర్టు ఉత్తర్వులను రద్దు చేసి, రిటైర్డ్ న్యాయమూర్తి పర్యవేక్షణలో విచారణకు ఆదేశించాలని సుప్రీంకోర్టును అభ్యర్థించింది. ఈ పిటిషన్‌ను న్యాయవాదులు దీక్షితా గోహిల్, ప్రాంజల్ అగర్వాల్, యశ్ ఎస్ విజయ్ దాఖలు చేశారు.