పీఓకేలో పాక్ ప్రభుత్వానికి వ్యతిరేకంగా హింసాత్మక ఆందోళనలు... ఆర్ఎస్ఎస్ చీఫ్ సంచలన వ్యాఖ్యలు
- పీఓకే మన ఇంట్లోని గది లాంటిదన్న మోహన్ భగవత్
- ఆక్రమణలో ఉన్న గదిని తిరిగి స్వాధీనం చేసుకోవాలని వ్యాఖ్య
- పీఓకే మనదే అని స్పష్టీకరణ
మధ్యప్రదేశ్లోని సత్నాలో జరిగిన ఓ కార్యక్రమంలో భగవత్ ప్రసంగించారు. "భారతదేశం మొత్తం ఒకే ఇల్లు. కానీ మన ఇంట్లోని ఓ గదిని ఎవరో ఆక్రమించుకున్నారు. ఆ గదిలో నా టేబుల్, కుర్చీ, బట్టలు ఉండేవి. దానిని నేను తిరిగి స్వాధీనం చేసుకోవాలి" అని ఆయన వ్యాఖ్యానించారు. ఆయన మాటలకు సభలో పెద్ద ఎత్తున చప్పట్లు మారుమోగాయి. దేశ విభజన సమయంలో సింధ్ ప్రాంతం నుంచి వచ్చిన వారిని ఉద్దేశించి మాట్లాడుతూ, వారు అవిభక్త భారతదేశం నుంచే వచ్చారని గుర్తుచేశారు.
అంతకుముందు, పహల్గామ్ ఉగ్రదాడి ఘటనపై అంతర్జాతీయ స్పందనలను ప్రస్తావించిన భగవత్, ప్రపంచ వేదికపై మన మిత్రులెవరో ఈ ఘటన తేల్చిందని అన్నారు. దేశ భద్రతా సామర్థ్యాలను మరింత పెంచుకోవాల్సిన అవసరం ఉందని ఆయన నొక్కిచెప్పారు.
ప్రస్తుతం పీఓకేలో పరిస్థితులు తీవ్ర ఉద్రిక్తంగా ఉన్నాయి. ఆర్థిక సంక్షోభం, రాజకీయ సంస్కరణలు కోరుతూ అవామీ యాక్షన్ కమిటీ (ఏఏసీ) ఆధ్వర్యంలో వేలాది మంది స్థానికులు రోడ్లపైకి వచ్చి ఆందోళనలు చేస్తున్నారు. గత మూడు రోజులుగా నిరసనకారులకు, పాకిస్థానీ బలగాలకు మధ్య జరుగుతున్న ఘర్షణల్లో ఇప్పటివరకు 10 మంది ప్రాణాలు కోల్పోగా, 100 మందికి పైగా గాయపడ్డారు. ముజఫరాబాద్, దాద్యల్, ధిర్కోట్ వంటి ప్రాంతాల్లో హింసాత్మక ఘటనలు చోటుచేసుకున్నాయి.
చర్చల ద్వారా సమస్యను పరిష్కరించకుండా, పాకిస్థాన్ ప్రభుత్వం అణచివేత ధోరణిని అవలంబించడం వల్లే పరిస్థితి మరింత దిగజారుతోందని విశ్లేషకులు అభిప్రాయపడుతున్నారు. దశాబ్దాలుగా కశ్మీర్ విషయంలో ఇస్లామాబాద్ ప్రచారం చేస్తున్న అబద్ధాలను పీఓకే ప్రజల నిరసనలే బట్టబయలు చేస్తున్నాయని నిపుణులు పేర్కొంటున్నారు.
