రికార్డులు బద్దలు కొట్టిన పసిడి, వెండి ధరలు.. ఆకాశమే హద్దుగా కొత్త గరిష్ఠాలు!

బులియన్ మార్కెట్‌లో ధరల మోత మోగుతోంది. బంగారం, వెండి ధరలు సోమవారం సరికొత్త రికార్డులు సృష్టించి, ఆల్-టైమ్ గరిష్ఠ స్థాయికి చేరాయి. దేశీయ మార్కెట్‌లో ఈ పెరుగుదల అనూహ్యంగా ఉండటంతో పెట్టుబడిదారులు సంబరాల్లో మునిగిపోయారు. ముఖ్యంగా వెండి ధరలో కనీవినీ ఎరుగని రీతిలో భారీ పెరుగుదల నమోదైంది.

ఢిల్లీ స్పాట్ మార్కెట్‌లో సోమవారం ఒక్కరోజే కిలో వెండి ధరపై ఏకంగా రూ.7,000 పెరిగి రూ.1.5 లక్షల మైలురాయిని తాకింది. గత వారం రోజుల్లోనే కిలో వెండిపై రూ.19,051 పెరగడం గమనార్హం. మరోవైపు, 10 గ్రాముల స్వచ్ఛమైన బంగారం ధర రూ.1,500 పెరిగి రూ.1,19,500 వద్ద స్థిరపడింది.

ఈ ఏడాది ప్రారంభం నుంచి బంగారం, వెండి పెట్టుబడిదారులకు లాభాల పంట పండించాయి. గత ఏడాది డిసెంబర్ 31 నాటి ధరలతో పోలిస్తే, 10 గ్రాముల బంగారంపై ఇప్పటివరకు రూ.40,550 (51.36 శాతం) లాభం రాగా, కిలో వెండిపై రూ.60,300 (67.22 శాతం) రాబడి వచ్చింది. ఇదే సమయంలో దేశీయ స్టాక్ మార్కెట్ సూచీలైన సెన్సెక్స్, నిఫ్టీలు ఎలాంటి లాభాలు ఇవ్వకపోవడంతో, పెట్టుబడిదారుల దృష్టి బులియన్ మార్కెట్‌పై కేంద్రీకృతమైంది.

తెలుగు రాష్ట్రాల్లోనూ అదే జోరు
ఈ ధరల పెరుగుదల ప్రభావం తెలుగు రాష్ట్రాల్లోనూ స్పష్టంగా కనిపించింది. సోమవారం హైదరాబాద్ మార్కెట్లో 10 గ్రాముల మేలిమి బంగారం ధర రూ.1,16,400 పలకగా, కిలో వెండి ఏకంగా రూ.1.59 లక్షల వద్ద ట్రేడ్ అయింది. గత వారం ప్రొద్దుటూరులో బంగారం రూ.1.19 లక్షలు, విశాఖలో వెండి రూ.1.59 లక్షల రికార్డు స్థాయికి చేరిన విషయం తెలిసిందే.

అంతర్జాతీయ మార్కెట్లతో పాటు దేశీయ ఫ్యూచర్స్ మార్కెట్‌లోనూ బంగారం, వెండి ధరలు ఇదే జోరును కొనసాగిస్తున్నాయి. మల్టీ కమోడిటీస్ ఎక్స్ఛేంజ్‌లో (ఎంసీఎక్స్) అక్టోబర్, డిసెంబర్ కాంట్రాక్టులు భారీ లాభాలతో ట్రేడ్ అవుతూ కొత్త రికార్డులను నమోదు చేశాయి.