ఢిల్లీ హైకోర్టును ఆశ్రయించిన నాగార్జున.. కార‌ణ‌మిదే!

టాలీవుడ్ సీనియ‌ర్ న‌టుడు అక్కినేని నాగార్జున ఆర్టిఫిషియల్ ఇంటెలిజెన్స్ (ఏఐ) టెక్నాలజీ దుర్వినియోగంపై న్యాయపోరాటానికి దిగారు. తన అనుమతి లేకుండా ఏఐ సాయంతో తన ఫొటోలు, వీడియోలను అక్రమంగా వాడుకుంటూ, వాటి ద్వారా వ్యాపారం చేస్తున్నారని ఆరోపిస్తూ ఆయన ఢిల్లీ హైకోర్టులో పిటిషన్ దాఖలు చేశారు. తన వ్యక్తిగత హక్కులకు భంగం కలిగిస్తున్న ఈ చర్యలను వెంటనే అడ్డుకోవాలని ఆయన కోర్టును కోరారు.

నాగార్జున తరఫున న్యాయవాదులు కోర్టులో వాదనలు వినిపిస్తూ, కొన్ని వెబ్‌సైట్‌లు ఏఐ టెక్నాలజీని ఉపయోగించి ఆయన ప్రతిష్ఠ‌కు భంగం కలిగించేలా ప్రవర్తిస్తున్నాయని తెలిపారు. నాగార్జున ఫొటోలతో అశ్లీల (పోర్నోగ్రఫీ) కంటెంట్, అనుమానాస్పద లింకులను సృష్టించి ప్రచారం చేస్తున్నారని కోర్టు దృష్టికి తీసుకెళ్లారు. అంతేకాకుండా, ఆయన ఫొటోలను టీషర్టులపై ముద్రించి ఆన్‌లైన్‌లో విక్రయిస్తూ అక్రమంగా వ్యాపారం చేస్తున్నారని తమ పిటిషన్‌లో పేర్కొన్నారు.

ఇలాంటి కార్యకలాపాలకు పాల్పడుతున్న సుమారు 14 వెబ్‌సైట్‌లను గుర్తించామని, వాటిని, వాటికి సంబంధించిన లింకులను తక్షణమే ఇంటర్నెట్ నుంచి తొలగించేలా ఆదేశాలు జారీ చేయాలని నాగార్జున కోరారు. గతంలో బాలీవుడ్ నటి ఐశ్వర్యరాయ్ కూడా ఇలాంటి సమస్యపైనే ఢిల్లీ హైకోర్టును ఆశ్రయించిన విషయాన్ని ఈ సందర్భంగా గుర్తుచేశారు.

ఈ పిటిషన్‌పై విచారణ జరిపిన ఢిల్లీ హైకోర్టు ధర్మాసనం, నాగార్జున లేవనెత్తిన అంశాలను తీవ్రంగా పరిగణించింది. ఆయన వ్యక్తిగత హక్కులను కాపాడతామని, ఈ విషయంలో తగిన చర్యలు తీసుకుంటామని హామీ ఇచ్చింది. ఏఐ టెక్నాలజీ వల్ల సెలబ్రిటీలు ఎదుర్కొంటున్న సమస్యలకు ఈ కేసు మరో ఉదాహరణగా నిలుస్తోంది.