సోదరుడు, ఐసీసీ చైర్మన్ జై షాకు పుట్టినరోజు శుభాకాంక్షలు: మంత్రి నారా లోకేశ్

అంతర్జాతీయ క్రికెట్ మండలి (ఐసీసీ) ఛైర్మన్ జై షా నేడు (సెప్టెంబరు 22) పుట్టినరోజు జరుపుకుంటున్నారు. ఈ సందర్భంగా ఆయనకు ఆంధ్రప్రదేశ్ మంత్రి నారా లోకేశ్ పుట్టినరోజు శుభాకాంక్షలు తెలిపారు. జై షాను 'నా సోదరుడు' అని సంబోధిస్తూ ఆయన నాయకత్వ పటిమను, క్రికెట్‌లో చేపట్టిన సంస్కరణలను లోకేశ్ ప్రత్యేకంగా కొనియాడారు. జై షా ఆధ్వర్యంలో క్రికెట్ ఆట సరికొత్త శిఖరాలకు చేరిందని ప్రశంసించారు.

జై షా నాయకత్వంలో తీసుకున్న కీలక నిర్ణయాలను లోకేశ్ తన సందేశంలో గుర్తుచేశారు. ముఖ్యంగా మహిళా క్రికెటర్లకు పురుషులతో సమానంగా వేతనాలు అమలు చేయడం, మహిళల ప్రీమియర్ లీగ్ (డబ్ల్యూపీఎల్)ను విజయవంతంగా ప్రారంభించడం వంటివి చరిత్రాత్మకమని పేర్కొన్నారు. వీటితో పాటు క్రీడాకారుల వేతనాలు, పెన్షన్లను బలోపేతం చేయడం, రికార్డు స్థాయిలో మీడియా హక్కులను సాధించడం ద్వారా ఆట అభివృద్ధికి ఎంతగానో దోహదపడ్డారని అన్నారు.

"మీరు క్రికెట్‌కు, భారతదేశానికి మరెన్నో సంవత్సరాలు సేవ చేయాలని మనస్ఫూర్తిగా కోరుకుంటున్నాను" అని నారా లోకేశ్ తెలిపారు. జై షా దార్శనికతతో క్రికెట్‌లోని అన్ని ఫార్మాట్లు, ప్రతి క్రీడాకారుడు, ప్రతీ అభిమాని ఉన్నత స్థాయికి చేరాలని లోకేశ్ ఆకాంక్షించారు. ఆయన దృఢమైన నాయకత్వాన్ని తాను ఎంతగానో ఆరాధిస్తానని పేర్కొన్నారు.