ఆసియా కప్‌: పాక్‌పై భారత ఓపెనర్ల విధ్వంసం.. గెలుపు దిశగా టీమిండియా!

ఆసియా కప్ 2025 సూపర్ ఫోర్ దశలో భాగంగా పాకిస్థాన్‌తో జరుగుతున్న కీలక మ్యాచ్‌లో టీమిండియా ఘన విజయం దిశగా దూసుకెళుతోంది. పాకిస్థాన్ నిర్దేశించిన 172 పరుగుల లక్ష్యాన్ని ఛేదించే క్రమంలో భారత ఓపెనర్లు అభిషేక్ శర్మ, శుభ్‌మన్ గిల్ ఆకాశమే హద్దుగా చెలరేగారు. వీరిద్దరూ పాక్ బౌలింగ్‌ను తుత్తునియలు చేస్తూ తొలి వికెట్ కు అజేయ శతక భాగస్వామ్యం నెలకొల్పడంతో భారత్ విజయం దాదాపు ఖాయమైంది.

దుబాయ్ అంతర్జాతీయ క్రికెట్ స్టేడియంలో టాస్ గెలిచిన భారత కెప్టెన్ సూర్యకుమార్ యాదవ్ ఫీల్డింగ్ ఎంచుకున్నాడు. దీంతో తొలుత బ్యాటింగ్ చేసిన పాకిస్థాన్, నిర్ణీత 20 ఓవర్లలో 5 వికెట్ల నష్టానికి 171 పరుగులు చేసింది. 

అనంతరం 172 పరుగుల లక్ష్యంతో బరిలోకి దిగిన భారత్‌కు ఓపెనర్లు అద్భుతమైన ఆరంభాన్ని ఇచ్చారు. ముఖ్యంగా యువ బ్యాటర్ అభిషేక్ శర్మ కేవలం 31 బంతుల్లో 4 ఫోర్లు, 4 సిక్సర్లతో 57 పరుగులు చేసి తన హాఫ్ సెంచరీ పూర్తి చేసుకున్నాడు. మరో ఎండ్‌లో శుభ్‌మన్ గిల్ కూడా దూకుడుగా ఆడుతూ 27 బంతుల్లో 47 పరుగులు చేశాడు. వీరిద్దరూ తొలి వికెట్‌కు 10 ఓవర్లలోపే 105 పరుగులు జోడించారు. పవర్‌ప్లేలోనే 69 పరుగులు రాబట్టి మ్యాచ్‌పై పూర్తి ఆధిపత్యం ప్రదర్శించారు.

తాజా సమాచారం అందేసరికి భారత్ 9.4 ఓవర్లలో వికెట్ నష్టపోకుండా 105 పరుగులు చేసింది. టీమిండియా విజయానికి ఇంకా 62 బంతుల్లో 67 పరుగులు చేయాల్సి ఉండగా, చేతిలో 10 వికెట్లు ఉన్నాయి. ఓపెనర్లు క్రీజులో పాతుకుపోవడంతో భారత్ సునాయాసంగా విజయం సాధించేలా కనిపిస్తోంది.