కాసేపట్లో రాహుల్‌గాంధీ ‘హైడ్రోజన్ బాంబ్’ ప్రెస్‌మీట్.. సిద్ధంగా ఉండాలంటూ కాంగ్రెస్ టీజర్!

దేశ రాజకీయాల్లో పెను సంచలనాలకు దారితీసే పరిణామం చోటుచేసుకోనుందా? 'ఓట్ల చోరీ'కి సంబంధించి తాను త్వరలో ఒక 'హైడ్రోజన్ బాంబు' పేలుస్తానని కొన్ని రోజుల క్రితం వ్యాఖ్యానించిన కాంగ్రెస్ అగ్రనేత రాహుల్ గాంధీ ఆ దిశగా రంగం సిద్ధం చేశారు. లోక్‌సభలో ప్రతిపక్ష నేతగా ఉన్న ఆయన నేడు మీడియా సమావేశం నిర్వహించబోతున్నట్లు కాంగ్రెస్ పార్టీ అధికారికంగా ప్రకటించింది. ఈ ప్రెస్ మీట్‌లో ఆయన ఏం మాట్లాడబోతున్నారనే దానిపై దేశవ్యాప్తంగా సర్వత్ర ఉత్కంఠ నెలకొంది.

'ఓట్ల చోరీ' అంశంపై ఇటీవల స్పందించిన రాహుల్ గాంధీ తన వద్ద కీలకమైన ఆధారాలు ఉన్నాయని, వాటిని బయటపెడితే అది ఒక 'హైడ్రోజన్ బాంబు'లా పేలుతుందని వ్యాఖ్యానించారు. అప్పటి నుంచి ఆయన ఎప్పుడు ఆ వివరాలు వెల్లడిస్తారా అని అందరూ ఆసక్తిగా ఎదురుచూస్తున్నారు. ఈ నేపథ్యంలో గురువారం ప్రెస్ మీట్ ఏర్పాటు చేస్తున్నట్లు ప్రకటించడంతో రాజకీయ వర్గాల్లో ఒక్కసారిగా వేడి పెరిగింది.

ఈ మీడియా సమావేశానికి మరింత ఆసక్తిని రేకెత్తిస్తూ కాంగ్రెస్ పార్టీ తన సోషల్ మీడియా ఖాతాలో ఒక టీజర్ వీడియోను పోస్ట్ చేసింది. "ఫాస్టెన్ యువర్ సీట్‌బెల్ట్" (సీట్ బెల్ట్ పెట్టుకోండి) అనే వ్యాఖ్యతో ఈ టీజర్‌ను విడుదల చేసింది. దీంతో రాహుల్ గాంధీ చేయబోయే ప్రకటన అత్యంత కీలకమైనదని, రాజకీయంగా తీవ్ర ప్రకంపనలు సృష్టించే అవకాశం ఉందని విశ్లేషకులు భావిస్తున్నారు. ప్రతిపక్ష నేత హోదాలో ఆయన చేయబోయే ఆరోపణలు ఎలాంటి రాజకీయ దుమారానికి దారితీస్తాయన్న దానిపై అందరూ ఉత్కంఠగా ఎదురుచూస్తున్నారు.