ఐటీ రిటర్న్ ల గడువుపై కేంద్రం స్పష్టీకరణ

గత ఆర్థిక సంవత్సరానికి (2024-25) సంబంధించిన ఆదాయపు పన్ను రిటర్నులు (ఐటీఆర్) దాఖలు చేసేందుకు గడువు ఈ రోజు (సెప్టెంబర్ 15)తో ముగియనుందని ఆదాయపు పన్ను శాఖ స్పష్టం చేసింది. గడువు పొడిగించారంటూ సోషల్ మీడియాలో జరుగుతున్న ప్రచారం వాస్తవం కాదని పేర్కొంది. 

గడువు పొడిగింపు లేదు – ఫేక్ ప్రచారంపై క్లారిటీ

"ఐటీఆర్ గడువు సెప్టెంబర్ 30 వరకు పెంచారు" అంటూ కొంతమంది సోషల్ మీడియా వేదికలపై ప్రచారం చేస్తుండగా, ఆదాయపు పన్ను శాఖ తన అధికారిక ‘ఎక్స్’ ఖాతా ద్వారా ఈ విషయాన్ని ఖండించింది.

“జులై 31 చివరి తేదీగా ఉన్న గడువును ఇప్పటికే సెప్టెంబర్ 15 వరకు పొడిగించాం. ఇప్పుడు మరోసారి పొడిగించినట్టు వస్తున్న ప్రచారం అబద్ధం. ఐటీఆర్ దాఖలుకు సెప్టెంబర్ 15నే చివరి తేదీ. ఫేక్ న్యూస్ నమ్మకండి,” అని స్పష్టం చేసింది.

24×7 హెల్ప్‌డెస్క్‌ సపోర్ట్

పన్ను చెల్లింపుదారులకు సహాయంగా కాల్స్, లైవ్ చాట్స్, వెబ్ సెషన్స్ వంటి సేవలతో రౌండ్ ది క్లాక్ హెల్ప్‌డెస్క్‌ను అందుబాటులో ఉంచినట్లు ఐటీ శాఖ వెల్లడించింది. ఐటీఆర్ దాఖలుపై సందేహాల నివృత్తికి ఇది ఉపయోగపడనుంది.

ఇప్పటి వరకు దాఖలైన ఐటీఆర్‌ల వివరాలు

దాదాపు 6 కోట్లకు పైగా పన్ను చెల్లింపుదారులు ఇప్పటికే ఐటీఆర్‌ను దాఖలు చేశారని ఐటీ విభాగం పేర్కొంది. వీటిలో 5.51 కోట్ల రిటర్నులు ఈ-వెరిఫై అయ్యాయని, ఇందులో 3.78 కోట్ల రిటర్నుల పరిశీలన పూర్తయిందని వెల్లడించింది.

మోసపూరిత వివరాలు – రిఫండ్ కోసం తప్పుదారి

ఆదాయపు పన్ను శాఖ మరో ముఖ్య హెచ్చరికను చేసింది. తప్పుడు సమాచారం లేదా మోసపూరిత మినహాయింపులు చూపించి రిఫండ్ తీసుకునే ప్రయత్నాలు నేరంగా పరిగణించబడతాయని, దీనివల్ల శిక్ష, జరిమానాలు మరియు పన్ను నోటీసులు వచ్చే ప్రమాదం ఉందని స్పష్టం చేసింది.

గుర్తుంచుకోవాల్సిన ముఖ్యమైన విషయాలు:

రూ. 3 లక్షలకు పైగా ఆదాయం ఉన్న ప్రతి ఒక్కరూ ఐటీఆర్ ఫైలింగ్ తప్పనిసరిగా చేయాలని సూచించింది. కొత్త, పాత పన్ను విధానాల్లో ఏది మీకు అనుకూలమో చూసుకుని ఫైల్ చేయాలని తెలిపింది.