పీఎంకేలో తండ్రీకొడుకుల చిచ్చు.. కుమారుడిని పార్టీ నుంచి గెంటేసిన రామదాస్!

తమిళనాడు రాజకీయాల్లో కీలక పరిణామం చోటుచేసుకుంది. పట్టాలి మక్కల్ కట్చి (పీఎంకే) పార్టీ వ్యవస్థాపకుడు ఎస్. రామదాస్‌కు, కుమారుడు అన్బుమణి రామదాస్‌కు మధ్య నెలకొన్న విభేదాలు తారస్థాయికి చేరాయి. పార్టీ నుంచి అన్బుమణిని బహిష్కరిస్తున్నట్లు రామదాస్ ఇవాళ సంచలన ప్రకటన చేశారు. అన్బుమణితో పార్టీ కార్యకర్తలు ఎవరూ ఎలాంటి సంబంధాలు పెట్టుకోవద్దని కఠిన ఆదేశాలు జారీ చేశారు.

కొంతకాలంగా తండ్రీకొడుకుల మధ్య పార్టీ నాయకత్వంపై అంతర్గత పోరు నడుస్తోంది. పార్టీ పెద్దల సలహాలను, చివరికి తండ్రిగా తన మాటను కూడా అన్బుమణి పదేపదే పెడచెవిన పెట్టారని రామదాస్ ఆరోపించారు. పార్టీకి తానే అధినేతనని రామదాస్ చెబుతుండగా, పార్టీ నిబంధనల ప్రకారమే తాను అధ్యక్షుడిగా ఎన్నికయ్యానని, ఎన్నికల సంఘం కూడా తననే గుర్తించిందని అన్బుమణి వాదిస్తున్నారు.

గతంలోనే రామదాస్ తన కుమారుడిపై తీవ్ర విమర్శలు చేశారు. "నిజానికి, అసలు తప్పు నాదే. 35 ఏళ్ల చిన్న వయసులోనే అతడిని కేంద్ర మంత్రిని చేశాను. కానీ అతడే గొడవను పెద్దది చేసుకున్నాడు" అని మే నెలలో విచారం వ్యక్తం చేశారు. పార్టీ ఎదుగుదలకు అన్బుమణి అడ్డుపడుతున్నాడని, తనను కార్యకర్తల నుంచి దూరం చేసేందుకు సిగ్గులేకుండా అబద్ధాలు చెబుతున్నాడని ఆరోపించారు.

గత ఏడాది డిసెంబర్‌లో రామదాస్ తన కుమార్తె కుమారుడైన ముకుందన్‌కు పార్టీలో కీలక పదవి ఇవ్వడంతో ఈ వివాదం మరింత ముదిరింది. పుదుచ్చేరిలో జరిగిన సర్వసభ్య సమావేశంలో ఈ నిర్ణయాన్ని అన్బుమణి బహిరంగంగా వ్యతిరేకించారు. ఆవేశంతో మైక్రోఫోన్‌ను టేబుల్‌కేసి కొట్టారని, ఆ ఒక్క చర్యతో పార్టీ ఒక్క క్షణంలో ముక్కలైపోయిందని రామదాస్ ఆవేదన వ్యక్తం చేశారు. అయితే, అన్బుమణి వైపు వెళ్లిన వారిని క్షమించడానికి తాను సిద్ధంగా ఉన్నానని ఆయన పేర్కొన్నారు.