ఆసియా కప్‌లో భారత్ శుభారంభం.. యూఏఈని చిత్తు చేసిన టీమిండియా

ఆసియా కప్‌లో తొమ్మిదో టైటిల్ వేటను భారత జట్టు విజయంతో ఆరంభించింది. దుబాయ్‌లో బుధవారం జరిగిన తమ తొలి మ్యాచ్‌లో యూఏఈ జట్టును చిత్తుచిత్తుగా ఓడించి 9 వికెట్ల తేడాతో అద్భుత విజయాన్ని అందుకుంది. బౌలింగ్, బ్యాటింగ్ రెండింటిలోనూ పూర్తి ఆధిపత్యం ప్రదర్శించిన టీమిండియా, కేవలం 106 బంతుల్లోనే మ్యాచ్‌ను ముగించి టోర్నీలో తమ ప్రస్థానాన్ని ఘనంగా ప్రారంభించింది.

ఈ మ్యాచ్‌లో టాస్ గెలిచి బౌలింగ్ ఎంచుకున్న భారత్‌కు, స్పిన్నర్లు అద్భుతమైన ఆరంభాన్ని ఇచ్చారు. ముఖ్యంగా మణికట్టు స్పిన్నర్ కుల్దీప్ యాదవ్ (4/7) తన స్పిన్ మాయాజాలంతో యూఏఈ బ్యాటింగ్ లైనప్‌ను కుప్పకూల్చాడు. అతనికి శివమ్ దూబే (3/4) కూడా తోడవడంతో యూఏఈ బ్యాటర్లు క్రీజులో నిలవలేకపోయారు. యూఏఈ జట్టులో ఓపెనర్లు అలీషాన్ షరాఫు (22), కెప్టెన్ మహమ్మద్ వసీం (19) మాత్రమే రెండంకెల స్కోరు చేయగలిగారు. ఒక దశలో 47 పరుగులకు 2 వికెట్లతో కాస్త మెరుగ్గా కనిపించిన యూఏఈ, ఆ తర్వాత కేవలం 10 పరుగుల వ్యవధిలోనే మిగిలిన 8 వికెట్లను కోల్పోయి 13.1 ఓవర్లలో 57 పరుగులకే ఆలౌట్ అయింది.

అనంతరం 58 పరుగుల స్వల్ప లక్ష్యంతో బరిలోకి దిగిన భారత్‌కు యువ ఓపెనర్లు అభిషేక్ శర్మ, శుభ్‌మన్ గిల్ మెరుపు ఆరంభాన్ని ఇచ్చారు. అభిషేక్ శర్మ (16 బంతుల్లో 30 పరుగులు) ఫోర్లు, సిక్సర్లతో విరుచుకుపడగా, గిల్ (9 బంతుల్లో 20 నాటౌట్) కూడా దూకుడుగా ఆడాడు. వీరిద్దరి ధాటికి భారత్ కేవలం 4.3 ఓవర్లలోనే ఒక వికెట్ నష్టపోయి లక్ష్యాన్ని ఛేదించింది. బంతుల పరంగా టీ20 ఫార్మాట్‌లో భారత్‌కు ఇదే అత్యంత వేగవంతమైన విజయం కావడం విశేషం. అద్భుత బౌలింగ్‌తో యూఏఈ పతనాన్ని శాసించిన కుల్దీప్ యాదవ్‌కు 'ప్లేయర్ ఆఫ్ ది మ్యాచ్' అవార్డు దక్కింది.