క్రికెట్ ప్రపంచంలో పరమ చెత్తగా ఫీల్డింగ్ చేసే జట్టు ఇదే!

క్రికెట్‌లో పాకిస్థాన్ జట్టు మరో అవాంఛనీయ రికార్డును తన ఖాతాలో వేసుకుంది. బ్యాటింగ్, బౌలింగ్‌లో అప్పుడప్పుడు సత్తా చాటినా, ఫీల్డింగ్ విషయంలో మాత్రం ప్రపంచంలోనే అత్యంత పేలవమైన జట్టుగా నిలిచింది. 2024 నుంచి ఇప్పటివరకు ఆ జట్టు ప్రదర్శనపై ప్రముఖ క్రీడా వెబ్‌సైట్ 'క్రిక్‌బజ్‌' విడుదల చేసిన గణాంకాలు ఈ విషయాన్ని స్పష్టం చేస్తున్నాయి.

'క్రిక్‌బజ్‌' గణాంకాల ప్రకారం, ఈ ఏడాది పాకిస్థాన్ ఫీల్డర్లు ఏకంగా 48 క్యాచ్‌లను నేలపాలు చేశారు. అంతేకాకుండా, సులభంగా లభించే 98 రనౌట్ అవకాశాలను చేజార్చుకున్నారు. ఈ రెండు విభాగాల్లో 41 జట్లతో పోలిస్తే పాకిస్థాన్‌దే అట్టడుగు స్థానం కావడం గమనార్హం. ఇక మైదానంలో బంతిని ఆపడంలోనూ విఫలమవుతూ 89 సార్లు మిస్‌ఫీల్డ్‌లు చేశారు. ఈ విషయంలో వెస్టిండీస్ (90) తర్వాత పాకిస్థాన్ రెండో స్థానంలో ఉంది. మొత్తం 12 పూర్తిస్థాయి సభ్య దేశాల్లో క్యాచ్‌లు పట్టే సామర్థ్యంలో పాక్ 81.4 శాతంతో 8వ స్థానంలో నిలవడం వారి ఫీల్డింగ్ దుస్థితికి అద్దం పడుతోంది.

ఇటీవల యూఏఈలో జరిగిన టీ20 ట్రైసిరీస్‌లో ఆఫ్ఘనిస్థాన్‌తో జరిగిన మ్యాచ్‌లో పాకిస్థాన్ 18 పరుగుల తేడాతో ఓటమి పాలైంది. ఈ ఓటమికి ప్రధాన కారణం దారుణమైన ఫీల్డింగే. కీలక సమయంలో క్యాచ్‌లు వదిలేయడం, మిస్‌ఫీల్డ్‌లు చేయడం ద్వారా ప్రత్యర్థికి సునాయాసంగా పరుగులు సమర్పించుకున్నారు.

అయితే, జట్టు ఫీల్డింగ్‌పై వస్తున్న విమర్శలను పాక్ ఆటగాళ్లు అంగీకరించడం లేదు. ఇటీవల ఓ మీడియా ప్రతినిధి ఫీల్డింగ్ వైఫల్యాలపై ప్రశ్నించగా, పాక్ పేసర్ హారిస్ రవూఫ్ తీవ్రంగా స్పందించాడు. "మీరు మ్యాచ్‌లను సరిగ్గా చూడటం లేదు. మా ఫీల్డింగ్‌లో ఎలాంటి తప్పులు లేవు. మళ్లీ ఒకసారి మా ఆటను సమీక్షించుకుంటే మీకే అర్థమవుతుంది" అంటూ ఆయన ఎదురుదాడి చేశారు. ఏదేమైనా, గణాంకాలు మాత్రం పాకిస్థాన్ ఫీల్డింగ్ డొల్లతనాన్ని స్పష్టంగా బయటపెడుతున్నాయి.